Parlamentario Alvin Molina (MEP): Parlamento ta wordo tira bou di taxi (bus)
When manure hits the fan…
E taxistanan tin un trabou importante, esta pa transporta nos bishitantenan pa nan destinacion na un manera safe, na un tarifa rasonabel, dunando un servicio confiabel y amabel. Cu e meta pa nos turistanan sigui bishita nos dushi isla. Taxista tambe tin cu tene nan mes na regla, e reglanan di trafico y contribui na caha di pueblo. E regla cu ta wordo trata door di gobierno awo, ta e cantidad di pasahero cu nan mag di transporta y e proceso pa traspaso di permiso (vergunning).
Den Comision di Transporte nos a reuni cu e representantenan di taxista. Minister a basha awa den e proceso pa haci cambio den maneho pa cu taxi. E taxistanan no ta sinti nan mes envolvi, no a wordo scucha y ni tuma na serio pa cu nan preocupacionnan. Tin varios problema cu un taxista ta encontra den nan trabou diario, cu minister no tin atencion pa nan, pero si ta tira problema extra den nan scochi. E problemanan real cu nan ta topa cu ne ta, entre otro transporte ilegal, stagnacion den trafico door di problema cu parkeo, peliger door di step electronico y pensioen pa taxista.
Pa colmo, ora cos a bira cayente, “manure hit the fan“, minister inhustamente ta tira Parlamento di Aruba bou di bus, bisando cu ta parlamento ta su hefe y a dune “opdracht” pa haci esaki. Loke cu minister a bisa no ta berdad, parlamento solamente a pidie pa investiga e posibilidad pa introduci un taximeter y haci esaki HUNTO cu tur stakeholder. Mare minister haci loke parlamento ta pidie pa haci, por ehempel pa cu agricultura y sushedad na Aruba. Parlamento y Fraccion di e Mep ta den proceso con pa atende cu e caso aki.
