Partido MEP na Wendrick Cicilia di partido AVP: E sitacion na Venezuela ta hopi serio pa hunga politica cu ne

PROCEDURA ELECTORAL PA ELECCION 2021 NA ARUBA TAWATA TRANSPARENTE

Un recien comunicado di e hoben Wendrick Cicilia di partido AVP, ta pone Partido MEP corda riba e dicho ‘Unda diabel no ta yega pa malinforma, gaña y manipula, e ta manda su discipulo’. Señor Cicilia a uni su mes na e manipulacion di su partido hungando un biaha mas e politcia di uza situacionnan penoso pa haya, den su mesun palabra, medaya olimpico di oro den gañamento y trocemento di berdad.

Partido MEP ta uni na Comunidad Internacional y ta keda boga pa transparencia na Venezuela

Na prome luga, Partido MEP ta reitera su posicion solidario cu pais bisiña Venezuela y ta uni na Comunidad Internacional y ta keda boga pa transparencia den e resultadonan di elecion 28 di juli ultimo. Na di dos luga, e sitacion na Venezuela ta hopi serio pa hunga politica cu ne. Y na di tres luga, no por compara resultado di eleccion na Venezuela cu e resultado di eleccion di 2021 na Aruba cu si tawata completamente transparente.

Cicilia, sinta den klas di corupcion

Cicilia, sinta den klas di corupcion, no a bay haci su huiswerk pero a scucha y ripiti loke su lider a comanda pa su partido y nan prensa comprometi pa haci. Y tambe a sigui malinforma pueblo y acusando Lider di MEP, Prome Minister di pais Aruba, Evelyn Wever-Croes di a comete iregularidad cu resultado di eleccion na 2021. Ta trata aki, segun Cicilia di 50 voto. Cicilia ta acusa Prome Minister di a kima e biyetenan di voto sin warda resultado di huez y alabes ta ataca profesionalnan tanto di Censo como di Conseho Supremo Electoral cu a guia e proceso electoral na Aruba, sea cua sea e partido ganado, cu tur transparencia y integridad.

Corte a conclui cu e resultado tawata estableci y corectamente legal

Partido MEP ta conseha señor Cicilia pa sali di klas di corupcion un rato y bay haci su huiswerk miho. Eleccion 2021 y su resultado na Aruba tawata transparente y cla. Pueblo a papia cla. Huez a dicta cla. Despues di eleccion 2021, esnan cu no tawata contento cu e resultado a bay Corte. Corte a conclui cu e resultado tawata estableci y corectamente legal. E procedura di conteo, e publicacion di resultado y despues e destruccion di e biyetenan di voto tur a bay segun ley y corectamente.

Conseho Supremo Electoral ta kima e biyetenan di voto, no Evelyn Wever-Croes

Y ta Conseho Supremo Electoral a actua corectamente y a kima e biyetenan di voto, no Evelyn Wever-Croes. Pasobra Conseho Supremo Electoral ta un entidad integro cu ta trahando pa hopi aña sin manipulacion di ningun partido politico. E echo cu partido AVP a perde eleccion 2021, no ta duna nan derecho pa insulta e trabou di e departamentonan di profesionalnan aki.

Mike Eman ta e gran amigo di Nicolas Maduro

Tampoco por compara resultado di eleccion di Venezuela di luna pasa cu no tawata transparente, cu e resultado di eleccion na Aruba na 2021 cu no tawata tin duda. Cu partido AVP no a keda contento cu resultado di eleccion 2021 y a perde su caso den corte, no kiermeen cu Conseho Supremo Electoral, Censo, Corte, Gobierno y MEP ta corupto. Y ta esaki ta e les cu e hoben Cicilia mester cuminsa siña, cu ta AVP ta e unico entidad corupto cu cada biaha cos no bay na su fabor, ta acusa tur otro di ta corupto, cu ta trece nos na e di cuater punto, laga nos no lubida cu ta Mike Eman ta e gran amigo di Nicolas Maduro na Aruba cu den e ultimo eleccion na Venezuela te ainda no por mustra prueba di a gana e eleccion cu transparencia.