Parlamentario independiente Ryçond do Nascimento: Corupcion cu traspaso di permiso di taxi

Mi ta apoya e esfuerso di minister Ursell Arends pa combati corupcion den cuadro di traspaso di permiso di taxi. Ursell a implementa algun medida den Decretonan Ministerial (Ministeriële Beschikkingen) pa combati e sistema di patronahe politico. Ta trata di corupcion cu ministernan ta comete cu permisonan di taxi y e practica di benta di permiso di taxi. Ursell no ta perfecto y e minister a comete algun eror aki aya, pero en general, nos mester conclui cu su iniciativa ta importante. P’esey e ta hopi bergonsoso con AVP, Gerlien Croes, MAS, Accion 21 y Otmar Oduber ta opone e maneho aki di e minister.

AVP a bin ta pusha e storia cu e maneho di Ursell pa cu e traspaso di permiso di taxi no tin pia ni cabes. Su medionan di comunicacion a yuda plama e pelicula di teror aki. Gerlien a demostra un biaha mas di ta berde light door di bisa cu el a drenta reunion cu minister Arends bruha y cu Gerlien a sali mes bruha for di e reunion. Mientras Miguel Mansur ni Marisol Tromp kier habri nan boca pa splica e situacion real, pa motibonan politico. Ta importante pa corda cu corupcion a gran escala ta hiba na aumento di prijs, pasobra na final di dia ta e ciudadano semper mester paga e gastonan. Enfin, e postura di AVP, Gerlien Croes, MAS y Accion 21 ta perhudica nos isla.

Reglanan stricto pa transferencia di permiso di taxi

Minister Ursell Arends ta cambiando e maneho di e permisonan di taxista desde 2022. E obhetivo ta pa aplica reglanan stricto riba peticionnan pa transferencia di permiso di taxi. Ta importante cu solamente e famianan di e taxistanan cu realmente a fayece of cu ta gravemente malo di salud por pidi un transferencia di e vergunning. Esey ta loke ley ta prescribi. P’esey Ursell tin un punto valido ora e ta bisa cu aunke articulo 15 di e Ordenansa Nacional di Transporte di Persona tin bon intencion, e articulo di ley aki ta crea espacio pa abuso y corupcion. Ursell tambe tin rason cu pa evita corupcion gobierno mester bin cu medidanan special y un aplicacion cuidadoso di e ley. Esey ta inclui encarga un comision independiente cu e otorgacion di permisonan di taxi pa asina stop e custumber cu ciudadano mester keda depende di politico. Esey tambe ta inclui digitalisa e proceso di permiso pa garantisa transparencia y evita interferencia politico. E medidanan aki por yuda crea un sistema cu ta trata tur peticion mescos. Un trato igual ora di haya permiso, ta un trato husto!

Potencial pa abuso

Tur hende sa cu den practica yen minister den pasado a abusa di e sistema di permiso di taxi. Un motibo pakico esey tabata posibel ta cu articulo 15 di e Ordenansa Nacional di Transporte di Persona tabata crea e posibilidad pa abuso di e funcion di e Minister encarga cu transporte. E articulo ta uza e palabra “por” (“kan”) pa duna e minister un espacio amplio di discrecion pa traspasa e permisonan. E libertad di minister a hiba na yen abuso y faboritismo. Asina articulo 15 a wordo uza pa traspasa permisonan na personanan cu no ta cumpli cu e rekisitonan pa obtene un permiso. E personanan aki a haya e permiso pa motibo di nan conexionnan politico.

Mester para hunto pa un rumbo nobo

Resumiendo, e ta tristo pa constata cu AVP ta keda e partido cu kier mantene tur e structuranan coruptivo den nos leynan. Gerlien su disposicion pa negocia pa keda den AVP despues di e prome sentencia di Benny Sevinger ta demostra cu e por wordo cumpra. Miguel Mansur y Marisol Tromp a perde e oportunidad pa para firme contra e sistema coruptivo, simplemente pasobra Ursell ta un contrincante politico. Asina nan ta demostra nan afiliacion na politikeria tradicional. Si nos kier tin futuro pa e pais aki nos mester para na banda di e berdad. Ursell por tin mil fayo, pero toch nos tin e deber di apoya minister Ursell ora e kier pusha pa un rumbo liber di corupcion.