Organo Ehecutivo AZV ta informa: Dokter Charl J. Kelly y dokter Mikeeo Martis, dos dokter di cas nobo na Noord.

Recientemente Organo Ehecutivo AZV a firma contrato cu dos dokter di cas nobo. Ta trata aki di dokter di
cas Charl J. Kelly y dokter di cas Mikeeo Martis. Ambos ta ubica na Noord 82A pero lo tene nan practica
separa for di otro, pues cada un lo tin nan propio grupo di pashent.
Ta despues di basta tempo cu Organo Ehecutivo AZV por brinda su aseguradonan e oportunidad pa haci
cambio di dokter di cas. Pues si abo ta den busca di un dokter di cas nobo, awor tin e oportunidad pa
haci cambio di dokter di cas.
Dokter Charl J. Kelly
Dokter Kelly ta Arubiano, a bay Colegio Conrado Coronel, Colegio Arubano, Universidad Ciencias Medicas
(Costa Rica) y e trayecto di specialisacion pa dokter di cas via e colaboracion ImSan y Vrije Universiteit
Amsterdam. Cu su amplio experiencia di trabou na Medwork N.V. Aruba y diferente stage na dokter di
cas D. de Cuba, Respaldo, Stichting Algemeen Bejaardenzorg Aruba y dokter di cas I. Algera; dokter Kelly
ta cla pa yuda su hendenan.
Tur persona cu pa cualkier motibo of otro tin deseo di haci un cambio di dokter di cas, por scoge pa
acerca dokter di cas Kelly na su oficina pa yena (y firma) e formulario di cambio di dokter di cas. Dokter
Kelly por comunica den e idiomanan Papiamento, Hulandes, Spaño y Ingles. Number di telefon di dokter
Kelly ta 2807523.
Dokter Mikeeo Martis
Entrante 1 di September 2024 un otro dokter di cas tambe lo cuminsa na e localidad Noord 82A, pues
mesun edificio cu dokter di cas Kelly, sinembargo cu su mesun oficina (y registro di pashent). Ta trata aki
di dokter di cas Mikeeo Martis. Dokter Martis ta Arubiano y despues di a haal su VWO diploma na
Colegio Arubano a dicidi di continua su estudio di medicina na Erasmus Universiteit (Rotterdam,
Hulanda). Su specialisacion pa dokter di cas el a haci na ErasmusMC (Hulanda).
Despues di su estudio dokter Martis a logra di completa su ECFMG (Educational Commission For Foreign
Medical Graduates) diploma pa asina por practica medicina na Merca tambe como na Europa. Dokter
Martis a completa diferente subspecialisacion pa asina por brinda un servicio mas amplio na su
pashentnan; entre otro echografia di barica, test pa funcion di pulmon (spirometria) y oftalmologia.
Dokter Martis ta registra den Registratiecommissie Geneeskundig Specialisten (RGS) como huisarts y
tambe e register College voor Huisartsen met Bijzondere Bekwaamheden (CHBB).
Durante su trayectoria dokter Martis a obtene amplio experiencia den cuido pa hende grandi (medicina
geriatrico), personanan cu ta mentalmente desabilita, cuido palliativo pa pashentnan cu ta terminal,
medicina di emergencia, medicina interno y cirugia.
Dokter Mikeeo Martis ta comunica cu fluidez e idiomanan Papiamento, Hulandes y Ingles. Tur persona cu
pa cualkier motibo of otro tin deseo di haci un cambio di dokter di cas, por scoge desde di 01 september
2024 pa acerca dokter di cas Martis na su oficina pa yena (y firma) e formulario di cambio di dokter di
cas. Number di telefon di dokter Martis ta 2806146.