Parlamentario Shailiny Tromp-Lee:
Poema ta un manera masha profundo di exprecion. Pabien na nos Poeta di Patria 2022

Diamars anochi a tuma lugar e competencia literario Poeta di Patria. E anochi aki a keda dedica na mi omo sr. Atan Lee dfm. Na 2014 riba iniciativa di Atan Lee, Gobierno a dicidi pa organisa e competencia literario Poeta di Patria cu e aña aki ta keda organisa pa di 9 biaha.

Poema ta sentimento o pensamento traduci den palabra. Un manera masha profundo di exprecion. Y e competencia aki ta enfoca riba nos isla, nos cultura, nos tradicion……tur loke ta di nos. E aña aki 15 persona a participa y e anochi tabata uno yena di palabranan cu a carisia e oreanan, a inspira y alimenta e alma y curason y a primi e boton di preocupacion y esun pa tuma accion. Un explocion di creatividad yena di emocion. Mi kier a felicita y gradici cada un di e 15 participantenan di ayera nochi. Un pabien di curason pa boso bunita poemanan.

Un felicitacion special ta bay pa e ganador absoluto Marilis Becker cu su poema ganado ‘E piesa di encanto’. Un poema pa lanta orguyo, inspira y encurasha. Alabes palabranan di pabien na e dos otro ganadornan. Na di dos lugar a sali Jhon Freddy Montoya cu su poema ‘Mi kier ta’ y na di tercer lugar a keda Luis Rudolfo cu su poema ‘Aruba, nos herencia’.

Mi ta termina aplaudiendo e comite organisado su trabou y tambe pa e produccion di e buki di compilacion caminda tur e poemanan cu e aña aki a keda presenta a wordo documenta.