Parlamentario Shailiny Tromp-Lee (MEP):
Un pueblo cu por reconoce su mes den su cultura, su Himno, su Bandera y loke ta haci Aruba unico, lo ta un pueblo invencibel. Sea orguyoso di ta un Arubiano.

Dia 18 di maart, Dia di Himno y Bandera, laga nos tur sali celebra nos Aruba. Nos simbolonan nacional lo resalta tur caminda paso asina nos ta identifica nos pais. Laga nos celebra nos Himno y Bandera den goso y seguridad, paso nos ta biba feliz den cordialidad riba un isla cu ta brinda nos tur cos.

Mas cu tur, nos lo ta celebrando nos hendenan. Nos fortalesa, esta caracteristicanan unico, nos cordialidad, nos sonrisa di bonbini, nos hospitalidad cu a forma nos pilar turistico, nos manera di comparti y nos spirito alegre, positivo y luchador. Nunca lubida cu cada un di nos, tur na nan manera, ta yuda nos pais progresa. Nos ta florece hunto. Nos por ta individuonan distinto, pero hunto nos ta forma e mosaico bunita, e economia floreciente y e forma di biba liber, riba nos propio pianan. Nos ta un isla bendiciona!

Un pueblo cu por reconoce su mes den su cultura, su himno, su bandera y loke ta haci Aruba unico, lo ta un pueblo invencibel. Nos por ta pasando den turbulencia. Nos por ta pasando den lama bruto, cu ola halto di un pandemia mundial, cu biento feroz di guera entre grandinan, pero nos sa den nos curason, cu nos lo sali di esakinan tambe. Nos sa di experiencia cu como un pueblo uni, un biaha mas nos lo surpasa e desafionan aki.

Aruba ta grandi, pesey riba e dia special aki, laga mi invita un y tur pa ban celebra nos Himno y Bandera, no solamente diabierna awor dia 18 di maart, no solamente e fin di siman aki, pero henter e aña, y henter nos bida. Laga nos celebra loke ta haci nos un Arubiano, loke ta haci nos unico.

Despues di 2 aña porfin nos por celebra e dia importante aki en grande. Ban gosa di e actividadnan organisa manera Manifestacion Cultural dia 17 di maart 2022 anochi riba Plaza Betico Croes y di e Ceremonia Protocolar y desfile dia 18 di maart 2022 di 8:30 di mainta cu tambe ta tuma lugar dilanti Plaza Betico Croes. Ban come nos dushi cumindanan crioyo, ban baila, ban gosa y mas cu tur cos ban planta e simia patriotico den e mas chikitonan, nos futuro di mañan. Ban lantanan cu un identidad propio cu ta fuerte, cu un amor grandi pa nos isla, cu un balor grandi pa tur loke ta di nos y cu un determinacion pa semper aprecia y lucha pa nos libertad. Laganan sinti y biba e palabranan……chikito y simpel bo por ta, pero si respeta.

Pabien Aruba y cu Papa Dios sigui drama su bendicion riba nos dushi isla. Pabien cu nos celebracion di 46 aña di Himno y Bandera. Ami ta orguyoso di ta un Arubiano!