Prome Minister Evelyn Wever-Croes: GOBIERNO DI ARUBA A DUNA UN RECONOCIMENTO SPECIAL NA TELEARUBA

Durante celebracion di Dia Mundial di Prensa 2024,

ORANJESTAD – Ya pa 7 aña consecutivo, riba Dia Mundial di Prensa, Gobierno di Aruba ta duna un reconocimento special na un medio di prensa. E aña aki a duna e reconocimento na TELEARUBA, pa nan colaboracion y cooperacion pa transmiti e mensahe di Gobierno na e comunidad di Aruba. Presente pa e ocasion aki tawata señor Giovanny Kock, señor Aldrick Werleman y señor Patrick Everon.

E reconocimento a wordo entrega durante e encuentro cu prensa dia 2 di september, den cuadro di Dia di Prensa 2024. Durante e entrega Prome Minister Evelyn Wever-Croes a bay bek den tempo y a referi na e tempo di e pandemia unda cu, danki na e cooperacion di TELEARUBA, Gobierno por a comunica por medio di conferencianan di prensa y trece e mensahe na comunidad di Aruba. Tur anochi a traves di TELEARUBA e ciudadanonan a sigui e situacion y e paso a paso durante e pandemia, y esaki tambe a yuda Aruba logra recupera hopi lihe.

Prome Minister a sigui bisa cu tawata momentonan di trabou intensivo pa Gobierno pero tambe pa e empleadonan di TELEARUBA, cu a coopera na tur momento pa trece e mensahe na e pueblo di Aruba. Pa e motibo aki y tambe pa e cooperacion durante 7 aña di gobernacion di Gabinete Wever-Croes, cu hopi orguyo Gobierno a entrega e reconocimento special na e planta nacional TELEARUBA.

“Mi ta corda e conferencianan di prensa tur anochi 7or durante e pandemia. Hopi cansancio pa nos pero sigur tambe pa empleadonan di TELEARUBA. Pero apesar di e situacion dificil e tempo ey semper nan a cumpli y a yuda nos trece nos mensahe padilanti na e pueblo. Gobierno di Aruba ta hopi orguyoso di nos planta nacional. Nan ta traha cu curason y semper pensando den e bienestar di pais Aruba y pa esey semper nos lo ta agradecido na nan. Danki y pabien na director di TELEARUBA señor Giovanny Kock, y henter su ekipo”, Prome Minister a expresa.