MINISTER XIOMARA TA FELICITA Y GRADICI CADA MIEMBRO DI PRENSA NA ARUBA

Den conexion cu celebracion Dia di Prensa

“Keda den e balansa profesional y laga boso compas moral sigui guia boso den e trabou pa informa y comunica cu nos comunidad”

Den conexion cu celebracion Dia di Prensa diadomingo 1 di september, Gobierno di Aruba a extende un invitacion dialuna mainta pa felicita nan y especialmente duna prensa di Aruba gradicimento pa e trabou cu nan ta desplega den nos comunicad. Minister di Finansa y Cultura, Xiomara Maduro a dirigi palabra masha bunita na cada prensa presente enfatisando cu prensa ta un di e pilarnan di nos comunidad cu ta facilita informacion pa tur ciudadano. Minister Maduro a haci comparacionnan entre prensa y politiconan den gobernacion.

E mandatario di finansa y cultura a remarca cu ta importante pa ta consciente semper di e rol cu prensa tin den su man. Esaki ta un derecho cu prensa ta haya apesar cu na Aruba no tin leynan cu ta indica cua ta e caminda y con leu por bay. Comparando cu e politico den gobernacion cu ta haya un derecho den su man pa haci un trabou pero esaki ta wordo limita cu leynan. Y mescos cu e politico, prensa tin e compas moral pa indica cua ta e limitenan den expresion y den duna informacion.

Un otro comparacion cu Minister Maduro a trece dilanti ta cu mescos den politica, hopi biaha bo ta para bo so ora cu mester tuma desicionnan, abo cu Dios, y hopi biaha ni coleganan ta para banda di bo. Den casonan asina ta mescos pa prensa tambe, sabiendo cu den bo man bo tin un poder y responsabilidad hopi grandi, especialmente si no ta limita pa leynan, ta e compas moral ta bira e guia pa tuma desicionnan den tur situacion. Con bo ta pensa, actua y kico bo ta sinti cu ta bon conforme con bo ta hiba bo bida, ta locual cu ta depende kico lo sali for di bo pen of di bo stem. Mescos pa e politico, su pen y su stem ta e instrument di mas importante cu e tin, pa prensa esaki no ta diferente.

E trabounan cu cada di miembronan di prensa y e politico ta haci pa e comunidad, ta di iguala. Tur dos ta importante. Mescos cu no ta tur hende ta gusta e trabou di tur politico, no ta tur hende ta gusta tur prensa. Pero realidad ta tambe cu nos tur tin cu convivi cu otro den un comunidad chikito. Den bida y den e trabounan aki, nos no por tin solamente bon experencianan. Ta e mal experencianan ta conscientisa nos cu tin e bon experencianan. Esaki ta e balansa den cada trabou.

E trabou pa informa un comunidad ta hopi importante. E trabou di educa ta mas importante lagando sensacionalismo un banda pa hala mas atencion di hende, pero cu informacionnan cu no ta noticioso. Den un comunidad chikito, semper mester corda kico e poder den bo man ta, kico e noticia ta y con bo ta scoge pa uza esaki den comunidad. Esaki ta hopi importante, pasobra e informacion por lanta of e por kibra un sociedad.

Minister Maduro ta felicita tur miembro di prensa riba nan dia special, Dia di Prensa y ta gradici nan pa e trabounan cu nan ta haci pa mantene nos pueblo informa. “Corda semper cu locual cu boso haci, boso ta ricibi bek multiplica. Esaki no ta un ley di politica sino un ley di bida y di universo cu ta existi prome cu nos y lo keda existi despues di nos. P’esey ta importante pa nos informa corectamente. Sa cu boso trabou ta wordo aprecia y balora pa cada minister di Gabinete Wever-Croes. Keda semper cu boso bon intencion pa informa nos comunidad. Keda den e balansa profesional y laga boso compas moral sigui guia boso den e trabou pa informa y educa nos comunidad. Nos sa cu boso trabou no ta facil y no tin orario fiho hopi biaha. Danki pa ta parti di informa nos comunidad y yuda fortalece nos pueblo cu veracidad”, Minister Maduro a expresa.