Minister Endy Croes: A BISHITA ROSARIO COLLEGE, EN CONEXION CU E LESNAN DI LESA Y SKIRBI NA PAPIAMENTO DEN KLAS 1

A keda comproba internacionalmente cu ora e alumno siña den su propio idioma prome, ta fortifica su base pa amplia den e otro idiomanan.

ORANJESTAD: Recientemente, Minister di Enseñansa y Deporte Endy Croes a haci un bishita oficial na scol basico Rosario College. Cabesante Monique Trapenberg a ricibi Minister Endy Croes, dirigente di SKOA y consehero di Ministerio di Enseñansa cu un caluroso bonbini. En conexion cu introduccion di Papiamento, Minister Endy Croes a pasa bishita klas 1 pa mira con e lesnan ta bayendo. E mandatario di Enseñansa a indica cu el a keda impresiona cu e interaccion entre e maestro y e alumnonan. Siña den idioma materno Papiamento lo beneficia e mucha den su proceso di siñamento, desaroyo di inteligencia emocional y habilidadnan critico di pensamento. Ademas di esaki, nan por conecta miho cu nan raisnan cultural. Fuera di esaki, e muchanan ta sinti mas confia y sigur den nan proceso di siñamento. Sra. Monique a expresa cu nan experencia cu introduccion di Papiamento ta hopi positivo. Pa finalisa, Minister Endy Croes ta desea tur alumno hopi exito y ta gradici tur maestro di klas 1 cu ta haciendo nan mayor esfuerso cu e implementacion di Papiamento e aña aki.