Prome Minister Evelyn Wever-Croes : FATIMA COLLEGE A PARTICIPA Y A GANA CU E PROYECTO DI EDUTECH
Como scol ganado, nan a ricibi 4 digiboards
ORANJESTAD – Diahuebs mainta Prome Minister Evelyn Wever-Croes acompaña pa Parlamentarionan Edgard Vrolijk y Shailiny Tromp-Lee y representantenan di Futura a bishita Fatima College pa admira e 4 digiboardnan cu e scol a gana cu e Proyecto di Edutech. Prome Minister a expresa di ta contento di por wak con entusiasma e docente y alumnonan ta pa traha cu e boardnan aki.
E alumnonan di Fatima College a indica di ya caba tabata traha cu algun ekipo, manera screen di television, laptop etc. pero pa nan, e digiboard ta hopi mas eficiente y mas agradabel pa traha y siña cu ne. Prome Minister a expresa cu esaki ta hopi bunita pa tende, mirando cu e idea tras di e proyecto di Edutech ta pa duna scolnan e oportunidad di gana material digital pa asina mantene nos muchanan “up to date” den e mundo digital.
“Mi ta felicita e ekipo completo di Fatima College y e alumnonan cu nan digiboards. Tambe mi ta gradici Futura cu e Proyecto di Edutech, na unda Gobierno a pone 800 mil florin disponibel pa scolnan na Aruba. Pa por participa, e scol lo mester inscribi y bin cu un proyecto innovativo, di cual si nan gana, lo ricibi e materialnan financia pa Futura.
Tambe mi kier a informa cu e ultimo ciclo di Edutech a habri caba y lo cera dia 21 di october 2024. Cu esaki, mi ta invita tur scol pa inscribi pa asina tin e oportunidad di ta un scol ganador. Masha pabien Fatima College y hopi danki Futura”, Prome Minister a expresa.
