Parlamentario Alvin Molina (MEP): Colaboracion ta esencial pa promove siguridad.

E ley pa haci esaki posibel a wordo aproba.

Siguridad sigur ta un topico cu merece di sigui haya atencion. Cualkier caso di corpucion, criminalidad, violencia of accidente cu sosode, cada un ta uno dimas. Manera ta conoci, Aruba a wordo nombra door di diferente instancia internacional como e pais mas sigur den Caribe y di Region. Nos mester ta hopi orguyoso di esey, paso ta nos como ciudadano ta contribui na e siguridad aki. Dimes cu e departamentonan tin un rol importante den esaki. Pero nos tin cu sigui pone atencion na siguridad. E ta importante pa e ciudadano sinti su mes safe na cas y riba caya. Alabes, pa nos bishitantenan sinti nan mes sigur na Aruba, dus e ta importante pa nos economia. Un ehempel ta e inversion den e camara room. Esaki no ta algo nobo pa Aruba. E sistema ta existi caba y e ley ta “in place”. Awo e ta wordo amplia, unda cu Minister Rocco Tjon, mi coleganan di KPA y diferente partner a traha duro riba e Operation Command Center ubica na Savaneta. A inverti den personal y material. Inicialmente, mi a subraya cu mester cuida e privacidad di hende, pesey nos mester percura cu e camara room y/of  imagen cu e ta genera wordo uza unicamente pa combati y preveni criminalidad y no pa haci redashi y/of invadi privacidad. Fuera di esaki, mester percura pa esnan cu ta encarga cu e camara room aki tene nan mes na e regla ey. E camara room ta resorta bou di Cuerpo Policial Aruba, pero nos tur sa cu KPA tin un scharsedad di personal. Pesey, mester percura cu e camara room aki tin suficiente hende pa e por funciona optimalmente. Recientemente, nos a trata e ley cu lo trata e punto aki, unda cu no solamente polis por traha den e Operation Command Center, pero otro ambtenaar tambe por yuda den e proyecto aki. Mas cu claro nan mester pasa diferente test, haci diferente estudio y mester pasa e screening. Awo un colaboracion entre polis y otro personal ta posibel pa e Operation Command Center por funciona optimalmente y asina contribui na un pais mas safe posibel.