CAft ta subraya e necesidad di e proceso di mehoracion pa maneho financiero di Aruba

Oranjestad – Economia di Aruba ta creciendo rapidamente. E finanzas gubernamental tambe ta mustra un imagen positivo. For di 2022, ta stipula e presupuestonan na tempo. Sin embargo, e informacion di hustificacion ta atrasa, manera e entrega laat di tanto e informenan di implementacion como e cuentanan anual ta mustra. Esaki ta mina e derecho presupuestario y e funcion di control di Parlamento. CAft ta haya ta positivo cu a inicia un trayecto di mehoracion pa duraderamente pone na ordo e maneho financiero. Awor ta importante pa Aruba duna pasonan contundente y duna prioridad na e trayecto di mehoracion.

Ciclo di presupuesto y hustificacion

A ofrece e proyecto presupuestario pa 2025 na Parlamento na tempo. Tanto pa 2025 como multianualmente, e presupuesto ta cumpli ampliamente cu e norma presupuestario central cu ta prescribi cu mester tin un surplus di un minimo di 1 porciento di e producto nacional bruto. CAft ta aprecia e resultadonan positivo aki.

Sin embargo, e proceso di implementacion y hustificacion ainda ta laga di desea. Tanto e informenan di implementacion como e cuentanan anual ta ser entrega laat. For di final di 2022, e retraso den e entrega di e informenan di implementacion a ascende te un kwartaal. Debi na esaki, CAft y Parlamento no por evalua suficientemente e grado di realidad di e presupuesto, y esaki ta limita nan den e implementacion di nan tareanan di control.

Ademas, Aruba tin hopi retraso den e stipulacion di e cuentanan anual. E cuentanan anual di 2019, por ehemplo, no a ser ofreci na Parlamento ainda. Pues ainda no ta cla ki dia lo stipula e cuentanan anual aki.

Trayecto di mehoracion maneho financiero

Actualmente, Aruba ta trahando riba un sistema di raportahe nobo, y riba e mehoracion di e control riba ingresonan y gastonan di e pais. CAft ta haya importante pa enfatisa cu e responsabilidad pa bon maneho financiero ta mas amplio cu solamente Minister di Finanzas. Cada Minister lo mester haci esfuerso pa logra esaki riba su departamento. Bon maneho financiero ta importante pa percura cu ta emplea recursonan publico di un manera adecua, sin malgasta ni abusa nan. Ademas, Parlamento ta haya un miho bista riba e estado financiero real di e pais. Esaki ta esencial pa un gobierno confiabel. P’esey ta importante pa Aruba logra realisa mehoracionnan significante for di awor.

Entidadnan gubernamental

Recientemente, Algemene Rekenkamer Aruba a constata fayonan den e maneho di y e supervision riba e entidadnan gubernamental. Cerca un cantidad di e entidadnan gubernamental, e hustificacion no ta na ordo. Gobierno mester vigila mas estrictamente e deber di hustificacion di e entidadnan gubernamental. Un falta di transparencia y hustificacion por conduci na riesgonan den futuro. CAft ya caba a pidi atencion pa mehoracion di e hustificacion di entidadnan manera Serlimar y Arubus N.V. CAft a bolbe expresa su preocupacionnan y ta urgi Aruba pa aumenta e autosuficiencia financiero di entidadnan gubernamental. Den e marco aki, implementacion di e Ordenanza Nacional Corporate Governance ta di importancia. Finalmente, CAft ta constata un aumento di servicionan gubernamental cu ta ser ehecuta remotamente, sin cu a substancia esaki debidamente.