Gerlien ta e imagen di e hende muhe moderno: Profesional, independiente y apasiona

Un di e nombernan mas menciona actualmente den e arena politico local ta mr. Gerlien Croes. Den un trayectorio di solamente shete aña den politica, el a crea un reputacion di ta un hende muhe fuerte cu principio, conviccion y curashi. Sinembargo, tin mas di Gerlien Croes pa conoce manera su origen, experiencia y expectativa.

Naci un 7 di februari di aña 1987, Gerlien ta un aquariano kende ta personanan cu ta distingui nan mes pa ta independiente, sabi, cu ideal, humanitario, cu ta siña for di su foutnan y semper tin algo di bisa; tur cualidadnan cu a lag’e destaca como un di e parlamentarionan di mas hoben den e historia di nos pais.

Aunke el a nace na e ciudad Hulandes di Rotterdam, no mester conoce Gerlien hopi pa ripara cu e ta e ehempel bibo di e Arubiano crioyo y orguyoso, lanta den curason di Paradera caminda su famia completo tin generacion tras di otro ta biba y su raiznan ta bon ancra. Su balor y principio ta basa riba e humildad y forsa cu semper nos pueblo a demostra.

Gerlien a yega Aruba como baby y den su hubentud el a regresa Hulanda pa e avansa su estudio. El a gradua for di De Haagse Hogeschool y Universidad di Maastricht caminda el a obtene un Master den Globalisacion y Ley cu un specialisacion den Derecho Economico Internacional. Manera semper tabata su deseo, el a regresa Aruba pa traha pa su pais y el a haci esey na Oficina di Union Europeo y Relacionnan di Reino.

Na 2017 y cu apenas 30 aña, Gerlien a sintie cla pa drenta arena politico y e no tabata robes den su intuicion. Resultado di eleccion a pon’e como e di tres politico femenino cu mayor cantidad di voto y e prome candidato y candidato femenino pa alcansa 982 voto riba posicion #18 di un lista politico. A pesar di su salida impresionante, e no a bin na remarca pa bira miembro di parlamento.

Na 2021, el a bolbe participa den eleccion parlamentario cu Partido di Pueblo Arubano AVP, caminda el a bay dilanti den voto te saca su mes cu 1919 voto y e biaha aki si el a forma parti di e constelacion di Parlamento di Aruba caminda e ta miembro di varios comision central, a destaca pa e manera cla y raspa di trece su punto dilanti. Na 2023, tras di un diferencia di opinion fundamental, Gerlien ta declara como miembro independiente di parlamento y ta bandona e fila di AVP.

Den su bida social, Gerlien ta fungi como boluntario di Marlboro Sportclub Foundation pa yuda lidera ekiponan infantil di baseball.Fuera di esey e ta un fanatico di musica, baile y ferviente amante di Carnaval.Den su bida priva, Gerlien ta separa y fuera di su responsabilidad profesional, e  ta mama di tempo completo pa su yiunan homber di 8 y 10 aña.

Mas cu nunca Gerlien Croes ta firme den su compromiso pa sigui traha pa bienestar di e pueblo di Aruba convenci cu e miho dianan di e pais aki ta su dilanti bou liderazgo di ser femenino. Un perspectiva miho y mas husto pa futuro ta loke ta inspira Gerlien pa sigui duna e maximo di su mes, pa cual a funda asociacion Futuro, conoci como partido TUR.

Su deseo ta pa e ciudadano Arubiano dun’e un oportunidad pa comparti su vision y plan pa asina ripara cu e ta e miho opcion pa deposita bo confianza y voto dia 6 di december 2024.