Parlamentario Marco Berlis (MEP):Proposicion pa bin cu un ley di integridad pa parlamento ainda ta riba mesa

Nos Parlamento ta e organo di mas halto di nos pais. E ta e cas di 21 representante di pueblo, cu tin e tarea pa controla gobierno di Aruba, conscipia leynan nobo, controla e presupuestonan di Pais Aruba y cuestiona e maneho y e integridad di gobierno. E ta pa e motibonan aki cu nos Parlamento semper mester keda un lugar di integridad y transparencia, pasobra si Parlamento di Aruba no ta integro, con anto Parlamento por exigi pa gobierno di Aruba ta integro? Parlamento di Aruba mester ta e “Cas di integridad,” e ehempel y standard di nos comunidad. Hamas nos por permiti ni neglisha e imagen y integridad di nos “Cas di Pueblo.”

Mocion presenta pa Parlamento conscipia un Ley di Integridad pa Parlamento
Den cuadro di esaki mi a presenta e peticion na varios ocasion na Parlamento pa nos forma un comision special pa explora y discuti e posibilidad pa trece un cambio den nos constitucion, pa por haci parlamentarionan mas accesibel pa duna cuenta na pueblo y exigi integridad den nan conducta. Mi a entrega un mocion cu e peticion aki for di 5 di April 2022 den Parlamento. Mi ta kere cu hunto nos por conscipia un ley cu ta tene nos “accountable” na pueblo. Nos mester por asegura cu e imagen di Parlamento hamas mag di bolbe wordo atacha, manera ta e caso aworaki. Parlamento, e “Cas di Pueblo,” mester keda intachabel y limpi di cualkier comportacion cu ta contra di nos leynan y constitucion.

MAS, Accion 21, AVP y Gerlien Croes contra un ley di integridad pa Parlamento
Ta net Marisol Tromp y Miguel Mansur cu ta cana traha video y ta grita duro den medionan social exigiendo integridad di gobierno, ta esnan cu mas fuertemente ta opone e idea pa Parlamento por ta mas integro. No tin boluntad, no tin niun intencion, ni tampoco e curason pa bini hunto y traha riba un proyecto asina importante cu lo protege e organo di mas halto di e pais. Marisol a uza tur tipo di excusa contra e ley di integridad pa Parlamento. Marisol, e politico cu ta gaba cu e tin 27 aña den politica, ta contra di un ley cu por salvaguardia intergridad di nos Parlamento. Pero obviamente AVP, ni Marisol, ni Gerlien, ni Accion 21 kier para pa un ley di integridad pa Parlamento. Esaki ta mucho “dificil” pa nan aparentemente. Mientras cu nan ta exigi gobierno ta transparente y integro, nan ta keda rechasa, resisti y boycotia e proposicion di ley aki.

Mi insistencia pa un Ley di Integridad pa Parlamento
Un ley di integridad pa Parlamento den mi opinion, no ta solamente un necesidad, pero tambe loke pueblo merece y nos pais mester. Si nos no por asegura e integridad di Parlamento y nos coleganan no tin “hamber ni sed” pa trece cambionan berdadero y profundo den e sistema politico di nos pais, nos Parlamento lo keda vulnerabel y accesibel pa esnan cu kier corumpi Parlamento, gobierno y nos pais. Mi ta un Parlamentario decidido cu kier wak cambionan crucial den Parlamento, y asina haci nos pueblo orguyoso di nos Parlamento atrobe.

Si pueblo desea mas informacion di e articulo aki, contact mi na tel: 528-4639 of email mi na: marco.berlis@parlamento.aw / Bo parlamentario y sirbidor di pueblo na bo ordo semper!