Parlamentario Alvin Molina (MEP): “We want more”.

Un encuentro informativo cu e pueblo di San Nicolas a tuma luga na Centro di Bario Lago Heights. Mi a elabora riba e desaroyonan cu ta andando, e mocionnan cu mi a presenta y proyectonan cu mi ta trahando riba nan. Ta mi trabou como representante di San Nicolas pa mira loke cu nos tin mester y keda urgi gobierno atencion p’e.

Pa San Nicolas por stop di ta un “ghost town” y contribui positivamente na economia, cultura, y bida social di Aruba ta necesario pa tin hopi mas movecion di hende. Mas movecion di hende lo trece oportunidad economico y mas bida den e cayanan di San Nicolas. Ta importante pa nos como habitante di San Nicolas y Aruba sostene nos comerciantenan local pa nan keda existi y pa atrae mas. Si nos no sostene nan, ta con nos por sigui progresa? E ta trabou di gobierno y inversionista, pero e ta nos trabou tambe pa inverti den nos districto.

Pa mainstreet di San Nicolas mi a pidi nos Minister President pa instala un comision cu ta consisti di diferente stakeholder pa bin cu un plan concreto cu comunidad ta sostene y ehecute. Dos aña y mey pasa mi a entrega un mocion, unda cu mi a urgi gobierno pa traha un stage y un muraya pa Carnival Village. Hunto cu Minister di Turismo y Minister di Cultura nos ta trahando riba e plan aki pa e bira un realidad. Hunto cu Hotel Secrets nos ta trahando riba diferente proyecto pa e hotel por contribui n’e desaroyo positivo pa pariba di brug, entre otro posibilidad pa hende local traha mas cerca di cas. Baby Beach Sports Arena ta un otro proyecto cu ta trahando riba dje. Ta trata di un proyecto deportivo cu diferente cancha pa, entre otro beach tennis, beach volleyball y beach futbol. Un bunita proyecto cu sigur lo atrea e hobennan di San Nicolas y bisindario pa practica deporte. Falta hopi mas pa wordo haci pa asina e bario di San Nicolas tambe por haya su “fair share” den e desaroyo di nos pais.