Cuminsamento di restauracion di Cas Veneranda

Diadomingo durante Open Monumentendag, Stichting Monumentenfonds Aruba (SMFA), Minister Geoffrey Wever y Minister Xiomara Maduro a anuncia cu orguyo e cuminsamento di e restauracion di Cas Veneranda, Wilhelminastraat 7.

Despues di basta preparacionnan, por mira cu e siman aki lo tin actividad na Cas Veneranda. E prome paso tawata pa obtene fondo di Ministerio di Economia pa por a yega na un acuerdo di compra cu e doño original di Cas Veneranda. Despues cu Minister Geoffrey Wever a ricibi apoderacion di Parlamento di Aruba e di dos paso tawata e preparacion pa firma e koopovereenkomst cu e famia di e doño original y firmamento di e huurovereenkomstnan. E Departamento di Asuntonan Economico, Commercio y Industria (DAECI) lo ta e huurdo principal y verder lo tin un etablisamento di horeca den e pida na banda di Schoolstraat. Esaki ta forma parti di e maneho di Minister Geoffrey Wever di Asuntonan Economico pa revitaliza Oranjestad.

E di dos paso tabata e design di e proyecto. Hoevertsz ArchiDesign N.V. a wordo scogi como architecto y hunto cu e projectleider di SMFA a guia e bouw team cu ta consisti di Pro-tec (airco), Rotech/Hecom (electra), Smart Systems (security) & Dynaf (solar). E subcontratistanan aki a wordo involvi den e proceso di design for di cuminsamento.

Den mesun periodo Minister di Cultura, Xiomara Maduro y Monumentenbureau a cuminsa cu e proteccion legal di e monumento. Asina e storia di e monumento lo wordo preserva pa semper y e historia lo keda biba. SMFA a cuminsa cu e proyecto di ‘Tales of Cas Veneranda’ Monumentenfonds Aruba | Tales of Culture, unda un y tur por comparti nan portretnan y storianan di antes di e cas monumental.

E di tres paso tabata e destaho y ehecucion pa e prome fase di e proyecto: demolishon. Durante e añanan hopi cos a wordo añadi na e edificio cu no tabata tey originalmente. Tambe e candela di 2014 a causa bastante daño. E contratista General Property Services a haci un bon trabao kitando tur cos ‘moderno’ di e monumento. Durante e fase di sloop a descubri hopi mas di e historia di e edifico. Ta impresionante pa wak con sabi y creativo e arkitecto (Dada Picus) tabata e tempo ey. Corda cu den construccion di e edificio no tabatatin power tools of otro cosnan moderno pa yuda nan.

Ora e demolishon a caba, e bouwteam por caba cu e bestek & tekeningen y destaho pa e di dos fase: restauracion, a cuminsa. Siman pasa a logra di haya un acuerdo cu contratista Jash Development N.V. cu den pasado ya caba a restaura Nicolaas Store pa SMFA. Awo Jash, hunto cu e otro miembronan di e bouwteam, lo restaura Cas Veneranda. E trabao di restauracion lo cuminsa di 23 di september, despues di prepara e bouwplaats, y lo caba fin di november 2025.

E ultimo paso lo tuma lugar fin di 2025/cuminsamento di 2026 ora nos huurdonan lo muda bay den monumento. E ora ey SMFA lo keda involvi den e mantencion di e edificio.

Cas Veneranda

E edificio impactante den Wilhelminastraat a keda construi na 1936 pa Federico Maximiliaan (Machi) Arends cu tabata e consul di Spaña.

E arkitecto tabata e conocido bouwmeester Dada Picus, cu a bay te Colombia pa haya inspiracion for di un edificio cu esposa di Machi, Maria Veneranda, tabata encanta cun’e y asina a bin Aruba bek pa construi e edificio cual awe nos conoce bou di e nomber di Cas Veneranda. Un di e casnan mas grandi na Aruba den e tempo ey construi.

Ademas di tabata un vivienda akinan tambe tabata tin e prome ‘Super’ Ice cream shop y e prome localidad di Masyfral. Oncha’s flowershop y e Consulado di Spaña tambe tawata ubica den e edificio. Na final di añanan setenta a comberti e edificio den Papiamento restaurant. Durante e ultimo dos aña e restaurant Papiamento tambe tawata opera como un club Nocturo (Club Nouveau) despues cu e restauarant tawata sera anochi. Despues cu Papiamento restaurant a sali di e edificio na final di 1990 ela keda bashi. Na aña 2023 Stichting Monumentenfonds Aruba a yega na un acuerdo di compra cu e herederonan di Machi Arends y na maart di 2024 a haci e traspaso oficial di e edificio pa por cuminsa cu e restauracion. E proyecto ta co-financia pa Algemeen Pensioenfonds Aruba (APFA) hunto na Nationaal Restauratiefonds di Hulanda (NRF) y Ministerio di Economia, Comunicacion y Desaroyo Sostenibel. Despues di e restauracion e monumento lo bira e oficina di DEACI y lo tin un espacio tambe pa horeca.

Stichting Monumentenfonds Aruba

Stichting Monumentenfonds Aruba  ta existi for di aña 1996 y ta un organisacion no gubernamental encarga cu adkiri, restaura, huur y mantene monumentonan di Aruba. Banda di esaki tambe ta pone enfasis riba educacion y conscientisacion tocante e importancia di nos monumentonan como parti di nos herencia cultural. Cas Veneranda ta e di 17 monumento cu ta propiedad di Stichting Monumentenfonds Aruba.

Pa mas informacion sigui nos riba social media: Monuments Fund Aruba | Instagram, Facebook | Linktree