Lider di partido: Evelyn Wever-Croes : PARTIDO MEP A DEMOSTRA DI TIN CURASON, CONOCEMENTO Y EXPERIENCIA PA GOBERNA PAIS ARUBA

Den e ultimo 7 añanan,

“No ta momento di “bolter cos” y pone Aruba den man di esnan cu a masacra nos pais, tampoco hendenan cu no tin conocemento ni experiencia pa sigui hiba e pais padilanti”.

ORANJESTAD – Diahuebs mainta 19 di september, durante e Conferencia di Prensa di partido Movimento Electoral di Pueblo (MEP) Lider di MEP, Evelyn Wever-Croes, a expresa cu partido MEP a demostra den e ultimo 7 añanan di tin e curason, e conocemento, y e experiencia pa goberna pais Aruba.

Partido MEP a sa di goberna den temponan dificil

Partido MEP a sa di goberna e pais den temponan dificil, na unda a encontra un situacion financiero y social deplorabel danki na e gobierno anterior di asignatura berde. Despues di esaki a bin e crisis di e pandemia di Covid, aki tambe gobierno di MEP a sa di traha responsabelmente pa Aruba recupera di esaki y a pone e pais riba un rumbo di progreso y prosperidad.

Desaroyo positivo di Aruba

Awe pais Aruba por conta riba un finansas publico na orden, na unda tin epspacio financiero pa haci inversionnan, y pa por yuda ciudadanonan den necesidad. E economia di Aruba ta bayendo hopi miho compara cu añanan anterior segun e impresion di sector priva y esaki sigur ta danki na e sector turistico cu ta bayendo sumamente bon. Danki na e desaroyo aki, desempleo ta na un porcentahe mas abou, indicando cu tin trabou na Aruba. Principal ta cu e inflacion cu a encarga di subi prijsnan haciendo costo di bida uno halto, ta bahando.

Logronan importante pa e pueblo

Mas importante ta cu Gabinete Wever-Croes a traha riba e trayecto di progreso y prosperidad pa cada ciudadano di pais Aruba. Empleadonan publico a haya indexering di 5.7% na aña 2024 y lo haya 6% adicional na Januari 2025. Pensionadonan a haya aumento di 15% y a elimina e belasting pa pensionadonan cu pension bou di 30 mil florin. Onderstand di gehandicapten a mira un aumento di 200 florin pa luna, y hasta esnan den sector priva cu no ta cay bou gobierno y ta gana menos di awg 2500 pa luna a haya un aumento.

MEP ta cla pa sigui traha

Esakinan ta logronan grandi di Gobierno di MEP y e plannan ta cla caba pa sigui traha na e progreso y prosperidad di cada ciudadano. Pero lamentablemente e partner den coalicion di Gabinete Wever-Croes a kibra e acuerdo di gobernacion di coalicion. Nan a kibra palabracionnan fundamental cu mester tene bo mes na dj’e pa wanta un gobierno y esey a conduci cu nan a baha e Gobierno.

Lider di MEP:

“Cu tur esaki den mente, partido MEP ta bati na bo porta cu tur humildad pa pidi bo e voto di confiansa, pa asina por finalisa e trabou grandi cu nos a cuminsa. Esaki no ta momento pa “bolter cos” y bay bek den pasado, ni pa cambia e rumbo positivo cu nos pais ta aden. No ta e momento pa pone e gobernacion di nos pais den man di esnan cu a masacra nos pais financieramente. Pero tampoco ta e momento pa pone e gobernacion di nos pais den man di hendenan cu no tin conocemento ni experiencia pa sigui hiba e pais aki padilanti, of di hendenan cu no por tene nan palabra. Aruba ta den un crusada hopi importante y nos ta sigui bay dilanti, nos no ta bay bek patras. Y encuestanan preliminar cu MEP a haci ta mustra cu esey ta e boluntad di e pueblo di Aruba. P’esey mi ta finalisa cu un invitacion na henter pueblo di Aruba pa uni na e movecion pa progreso y prosperidad pa cada ciudadano di nos pais”.