2.403 alumno di scolnan basico di e districo di Noord te cu Paradera a ricibi informacion tocante sintimento y e servicionan di 131

‘Mi ta sinti feliz paso mi a haya un dia mas pa mi hala rosea’. ‘Mi ta sinti tristo pa wak mi mama bao influencia di alcohol’.’Ami ta rabia ora mi ta game y coriente bay’. ‘Mi sinti tristo paso mi ta henter dia mi so. Mi mama y tata ta traha hopi’. Algun di e muchanan splicando nan sintimentonan.

For di 9 di september te cu 20 di september ultimo 131 a bishita un total di 9 scol di e districto di Noord te cu Paradera, pa asina dialoga tocante sintimento y duna informacion na e alumnonan tocante e servicionan di 131. Durante e bishita tur e klasnan di e scolnan a ricibi e informacion adapta na nan edad. Durante e ronda di concientisacion aki 2.403 mucha a ricibi informacion. E muchanan a encante e informacion cu nan a ricibi.

Primeramente e muchanan a siña tocante e cuatro sintimento basiconan (trsito, miedo, rabia y contento) y dicon ta importante pa combersa cu un adulto cu nan ta confia tocante nan sintimentonan. Cu na momento cu no tin un adulto di confiansa na scol of na cas, cu semper nan por wordo sosteni door di 131. Nan a haya informacion tocante e orario y dianan cu 131 tey pa scuchanan, cu e ta gratis y mas importante cu e ta anonimo. Cu anonimo kiermen cu nan momento cu nan tuma contacto cu 131, nos no por mira nan number di telefon, tampoco nan adres, nos no ta puntra nomber, y tampoco fam. Tambe nan a haya informacion tocante e website di 131 (131.aw) y e app di 131.

Na final tur e muchanan a ricibi un sticker di 131, cual ta e sticker cu ta identifica e mucha como un sostenedo di e muchanan cu por ta pasando den termento. Termento ta haci hopi dolor na e muchanan cu ta pasa aden, y nan sigur mester nan amigonan y amiganan pa sostene nan pa asina nan logra surpasa esaki.

E servicionan di 131 na nos muchanan y hobenan nan Aruba por tuma lugar danki na sosten di Setar N.V., Aruba Airport Authority N.V. y The Salamander Group.