Aruba Bank ta un patrocinador orguyoso di e “Caribbean Journalism Seminar 2024”
Oranjestad – 24 di september 2024 – Aruba Bank ta orguyoso di a patrocina e prome “Caribbean Journalism Seminar 2024”, organisa pa Red Arubiano di Prensa Profesional (RAPP), cu a tuma lugar riba 20 di september na Impact Hub Aruba. E evento, cu a wordo asisti pa mas di 60 profesionalnan di media, studiante y individuonan interesa den e topico di periodismo den Caribe, a resulta un exito rotundo.
E tema di e seminario, “Turning Challenges into Opportunities”, a elabora riba retonan importante cu periodistanan ta enfrenta den comunidadnan den Caribe, cu enfoke special riba manera cu nan por supera e retonan aki atraves di inovacion y colaboracion. Durante e seminario tabata tin un presentacion clave di nos colega Marlon Kock, Ingeniero di UX na Aruba Bank. Marlon a tene un charla interesante riba e rol di toolsnan pa AI den empoderando periodistanan di Caribe, mustrando tecnicanan moderno cu por wordo uza pa fortalece periodismo investigativo y promove responsabilidad.
Como un patrocinador, Aruba Bank ta reafirma su compromiso pa sigui duna sosten na e desaroyo di periodismo profesional den Aruba y den Caribe. Nos ta honra di por contribui na un evento cu ta nifica crecemento y educacion di periodistanan, pues nos ta kere firmemente cu un prensa liber, responsabel y bon informa ta esencial pa desaroyo continuo di nos comunidadnan.
E seminario di e aña aki ta marca e prome evento cu RAPP ta aspira pa bira uno anual, celebrando Dia di Prensa y fortalece e bos di periodismo Caribense atraves di entrenamiento, desaroyo etico y abogacia. Aruba Bank ta spera di por sigui duna sosten na iniciativa cu ta stimula transparencia, integridad, y involucracion comunitario.
