Seminario Co-Parenting den Harmonia
E team di Happy Parents, Happy Children ta contento di por anuncia nan di tres evento anual en connecion cu Dia Internacional di Mucha. E aña aki, nan ta presenta un seminario cu e titulo: Co-Parenting den Harmonia, un topico importante pa hopi famia den comunidad.
Ta importante pa menciona cu co-parenting no ta tuma lugar solamente entre mayornan separa of divorcia. Co-parenting ta pa tur mayor, biba hunto, mescla, casa, asta esnan cu ta lanta nan yiunan cu nan abuela y abuelonan. E seminario aki ta diseñá pa duna informaccion valioso y tools nan practico pa tur tipo di mayornan.
E seminario lo tuma lugar Diasabra 2 di November di 9AM di mainta te cu 1PM di merdia na Occasions Ballroom, Metro Mall. Pa locual ta oradornan, nan ta contento di tin un biaha mas Johnny Boekhoudt, un psicologo y orador favorito di aña pasa, cu lo bai elabora riba e aspecto emocional y psicologico di co-parenting. Johnny lo elabora riba comunicacion efectivo, solushon di conflicto, compronde impacto emocional riba e mucha, expresa sintimento y mucho mas!
Tambe como orador lo tin Sra. Nancy Gravenstijn, un abogada conosi, cu lo papia riba e aspecto huridico/legal di co-parenting. Un topico vital, specialmente cu e number nan halto di divorcio riba e isla. Nunca ta mucho trempan of laat pa sa bo derechonan. Abogada Gravenstijn lo elabora un poco mas riba areglonan entre mayor, responsabilidad financiero, derecho di bishita, procedura y mucho mas.
Co-organisado y host di aña pasa, Laura Tromp, un coach di mayor lo ta biahando for di Hulanda pa bin presenta riba e aspecto proactivo di co-parenting. El lo papia riba e importancia di plania delanta y di ta proactivo ora ta jega na bienestar di bo famia y yiunan. Compronde Inteligencia Emocional den co-parenting, crea bo propio family values y strategianan pa comunicacion efectivo y mucho mas.
Ademas, organisadornan a invita representante di Plan di Mayor y Voogdijraad pa uni den un panel pa asina por ofrece informacionnan importante cu ta trata sosten pa mayor den co-parenting.
E seminario lo ta uno sigur interesante, informativo, empoderante y importante, y lo sirbi sigur pa duna guia na tur mayor, nunca bo no ta perde di sinja algo nobo. Ticket ta solamente 50 florin, disponibel via Pay.aw, Van Dorp, y Plaza Bookshop. E ticket ta inclui informacion valioso, un workbook, desayuno y light lunch.
E seminario aki no lo ta posibel sin ayudo di Aruba Bank. Organisadornan ta gradici Aruba Airport Authority, Aruba Tourism Authority, Setar N.V., Elite Productions, Compra N.V. pa nan aporte pa cu e seminario aki y ta gradicid nan pa skohe pa inverti den comunidad y mas aun pa bienestar di nos futuro, nos muchanan.
Organisadornan kier invita tur mayornan pa busca nan ticket awe mes pa e seminario aki, paso lugar ta limita. E seminario aki ta un oportunidad pa mayornan uni, siña, y comparti experiencianan, mientras por benificia di strategianan duna pa expertisionan pa asina hunto nos crea un siguente generacion mas saludable y feliz!
Ban traha pa nos yiunan, no contra nan 🙂
