𝐏𝐚𝐫𝐭𝐢𝐝𝐨 𝐃𝐢𝐫𝐞𝐜𝐜𝐢𝐨𝐧 𝐏𝐨𝐥𝐢𝐭𝐢𝐜𝐚 , Pueblo di Aruba.

Mediante e communicado di prensa aki mi ta desea di informa pueblo cu mi persona, y
Partido Direccion Politiea a manda informa Conseho Electoral di Aruba mediante un carta
cu nos lo no ta participando na e eleccion benidero di 6 december 2024.
Mi kier a usa e espacio pa primeramente, gradici e mundo di prensa cu semper man
habri a sa di sostenemi pa por informa Aruba riba kico tabata e puntonan di preocupacion
cu nos tabatatin. Mi kier a extende palabra di gradicimento na tur persona cu a y ta sigui
kere den e vision di PDP, na e personanan cu a sa di extende nan ayudo di e prome dia. Mi
sa cu hopi persona tabatatin deseo pa wak PDP yega eleccion, pero nos como organisacion
mester tuma un decision pensando riba e interes y bienestar general di Pais Aruba. Mirando
e hecho cu e periode di eleccion ta asina serca, organisatoriamente y financieramente e ta
presenta retonan cu aworakinan como organisacion no ta alcansabel mas pa por presenta un
organisacion solido cu por brinda e confiansa na e electorado pa ta un opcion real pa e
grupo cu ta determina pa vota pa algo diferente.
Personalmente, e decision aki ta kibra mi curason, pero tin ora como un lider bo tin cu
accepta cu e circumstancianan no ta faboral y esey ta pone cu bo tin cu haci un reflexion
profundo riba ki impacto bo decision lo tin pa Aruba. Mi compromiso cu hobennan,
studiantenan, muchanan y pueblo di Aruba no a termina. Paworkinan lo mi enfoka
completamente riba mi estudio, pero mi por comparti cubo cu desde 18 di september mi
por yama mi mes un hurista cu mi titulo di LL.B. , esaki sigur ta motivami mas pa por
continua cu mi Masters pa asina por sigui profesionalisa mi mes. Mi rol den politica lo ta
uno diferente, pero misa cu e compromiso pa empoderacion lo continua. E decision aki no
tabata uno fasil pa ningun di nos, pero na final di dia como politico mi ta haye mas
importante pami por keda cu mi normanan y balornan, cu mi por wak e electorado y por
usa e palabra integridad. Aruba nos a purba na varios ocasion di presenta un alternativa
diferente den forma di lista combina, pero esaki no tabata exitoso. Esaki ta forma un di e
motibo primordial cu nos organisacion a opta pa no forma parti di e eleccion benidero,
conhuntamente cu retonan organisatorio y prioridadnan personal cu ami ta hayami
confronta cunele den e momentonan aki.

Aruba, mi deseo ta pa bo reflexiona fuerte riba e eleccion di 6 di december, esaki ta bo
oportunidad pa duna bo opinion riba e gobierno actual y pesey mi kier haci un suplica pa
bo sali vota, vota riba contenido y proposicion cu bo ta sinti ta importante pabo. No
laga un sticker, banner of promesanan falso determina bo voto. Nos kier recordabo cu cada
voto tin un consecuencia pa 3 generacion despues dibo, vota pensando riba bo nietonan, y
yiunan. Cu e pregunta di ki futuro nos kier laga atras pa nan.
Mi kier dirigi mi mes na e miembronan di prensa, boso ta e di 4 poder den nos estado di
democracia y esaki ta exigi di boso un tarea y responsabilidad grandi, pa por trece
informacion correcto, imparcial y por yuda e electorado ta bon informa pa asina por
contribui na e celebracion grandi di nos democracia.
Aruba mi kier a bisabo danki, kisas awor no ta e momento pami y esey ta algo cu mi tin cu
accepta pero mi kier desea tur e otro lidernan politico hopi forsa, sabiduria y pasenshi. Mi
kier pidi boso pa pone e interes di pueblo y e bienestar general na promer lugar, no laga
boso ambicion y agenda personal gobernabo. Aruba tin mester di nos tur pa por garantisa
un progreso pa nos isla. Mi kier pidibo pa bo corda cu como un lider bo tin un obligacion
di crea mas lider, informa, educa, conscientisa y eleva e pueblo su conocimento.
Finalmente, hobennan, mi tabatatin un soño pa abo por a mira un hoben di 23 aña den
parlamento, pa nos generacion Zoomers (GEN-Z) por a haya representacion pa prome
biaha y garantisa cu riba e temanan importante den parlamento nos por a legisla leynan cu
lo a garantisabo un miho posicion juridico cu mas oportunidad. Mi no a logra y mi kier
pidibo despensa, pero misa cu nos impacto ta uno grandi y cu a inspira miles di otro hende
pa continua cu e trabao cu mi a cuminsa. Mi kier suplicabo pa sali vota, vota pa un miho
futuro, vota pa mas opportunidad, vota paso Aruba tin mester di nos bos aworakinan mas
cu nunca.

Aruba di mi curason mi ta bisabo te despues, y lo mi reflexiona profundo riba mi futuro
den politica y mi kier a gradici cada persona cu a brindami cu un conseho, cada votador cu
a tuma nan tempo valioso combersa cumi y contami kico tabata nan preocupacionan.
Aruba nos ta lidernan, y como lidernan nos meta primordial ta pa crea otro lidernan.
Un abrazo profundo di boso sirbido ,