Lider di partido: Evelyn Wever-Croes : DEN UN SALA COMPLETAMENTE YEN, LIDER DI PARTIDO EVELYN WEVER-CROES A ENTREGA UN RECONOCEMENTO NA FAMIA DI SEÑOR APOLONIO WERLEMAN (POY)
ORANJESTAD – Diaranson anochi na Cede di partido Movimento Electoral di Pueblo (MEP), a organisa un encuentro na unda den compania di famianan y conocirnan a repasa riba e bida y logronan di señor Apolonio Werleman (Poy) dfm.
E anochi special aki a wordo organisa pa Fundacion Formacion Politico Nelson Orlando Oduber (FFPNOO) cu tin como tarea e formacion politico di e siguidornan y candidatonan, pero specialmente pa comparti e historia di MEP dunando charlanan cu ta titula Fundeshinan di Cambio, y dunando honor na lidernan cu a pone nan talento y potencial disponibel pa construi fundeshinan solido cu a permiti e progreso di pais Aruba.
Señor Apolonio Werleman, miho conoci como Poy dfm, sigur ta un persona cu a nifica hopi no solamente pa partido MEP sino tambe pa e bario di Santa Cruz y Aruba en general. Pa loke ta partido MEP, Poy dfm a wordo pidi dor di Nos Libertador Betico Croes pa bira miembro di Staten Insular. Tambe Poy dfm a sirbi como consehero di ex lider di partido señor Nelson Orlando Oduber, na unda e tabata controla e presupuestonan y traha synopsis di e contractnan grandi cu hotel y inversionistanan.
Pa e bario di Santa Cruz, Poy tambe a dedica hopi di su tempo y sabiduria. E tabata cofundador di e prome kleuterschool, basisischool y middelbare school na St Cruz, y tambe cofundador di Avond Havo Aruba.
Poy dfm tambe a traha incansabel na progreso y bienestar di pais Aruba, biniendo cu cambionan den formacion di reino, y den kiesgerechtigden, Tambe e tabata parti di e comienso di lucha pa separacion.
Na final di e anochi special aki, como muestra di aprecio y gratitud, lider di partido Evelyn Wever-Croes a haci entrega di un reconocemento na e famianan presente. E anochi a conta cu un sala completamente yen, na unda no solamente famianan, sino tambe conocirnan y fiel votadornan di partido tabata presente pa mustra nan aprecio y gratitud na famianan di POY dfm, pa tur loke el a nifica pa partido MEP, y Aruba en general.
