Encuesta “Entrada y Gastonan 2023-2024” di CBS riba bon caminda
Oficina Central di Estadistica (CBS) kier informa cu actualmente ta tumando lugar e di diesun (11) periodo di bishita pa cu e encuesta di Entrada y Gastonan. Durante e prome dies (10) periodonan, cual a inicia na luna di October 2023, encuestadornan a bishita adresnan ful rond di Aruba. En total mil shete shen y un (1,701) hogar a permiti nos diesocho (18) encuestadornan drenta nan cas y coopera cu nos encuesta.
E encuesta di Entrada y Gastonan previo na esun di 2023-2024 a tuma lugar na 2016. Cu e ciclo nobo aki, CBS lo por duna un bista di entre otro con e patronchi di consumo di nos poblacion a cambia durante e ultimo ocho añanan. E datonan compila durante e encuesta, ta wordo procesa completamente anonimo. E resultadonan di e encuesta aki lo wordo usa principalmente pa ahusta e pesonan di e componentenan basico di e canasta di consumo di e Indice di Prijs di Consumo (CPI).
A base di e evolucion di e prijsnan y e pesonan di e canasta di CPI, CBS ta calcula mensualmente e CPI y e cambio di porcentahe di prijsnan en general (inflacion). E indice di prijs ta un indicador importante pa e economia di Aruba. Elaboracion di un CPI tin tres meta principal: 1. Como un metodo di calculo pa compensa empleadonan pa motibo di perdida di poder di compra, ahustando nan salarionan, cu e proporcion di e cambio porcentual di CPI, locual ta conoci como indexering, 2. como un mecanismo pa ahusta componentenan di e producto domestico bruto (GDP) di termino nominal pa termino real den Cuentanan Nacional y 3. como un medio pa gobiernonan y/of banconan central fiha obhetivonan inflacionario.
E encuesta aki tambe lo duna un bista riba e necesidadnan di gruponan vulnerable den nos comunidad. Di e manera aki e indice di prijs ta importante pa e bienestar social y economico di nos poblacion. Sin un bista cla di e forza di compra di nos poblacion, lo bira sumamente dificil pa actua conscientemente den caso cu surgi efectonan negativo riba tereno socio-economico.
Ainda tin dos (2) periodo di bishita planea pa asina caba di completa e ciclo di 1 aña di investigacion riba e Entrada y Gastonan di hogarnan segun recomendacion internacional. Pa esaki CBS ta conta riba e participacion continuo di henter nos poblacion.
Ta importante pa remarca cu tur encuestador(a) di CBS tin un badge y un uniform pa identifica nan mes debidamente. Si acaso un encuestador(a) no tin su uniform bisti, semper e lo por identifica su mes cu su badge.
Pa cualkier pregunta di e Encuesta di Entrada y Gastonan 2023-2024, por tuma contacto cu Oficina Central di Estadistica, durante oranan di oficina na 524-7433, y puntra pa cualkier miembro di e team di e encuesta. Tambe por manda un e-mail na cbs@setarnet.aw
