Fundacion BOB Aruba ta cambia di nomber pa Fundacion ABO y ta amplia su programanan di screening.
Oranjestad, Aruba – 26 September 2024
BOB Aruba, e fundacion cu ta conduci e Programa National di Screening di Pecho ta anuncia cu orguyo, su nomber nobo: Fundacion ABO, esta Stichting Aruba Bevolkingsonderzoek. E cambio den nomber ta refleha e expansion di su mision y programanan di deteccion.
Ademas di e programa, ya conoci pa cancer di pecho, Fundacion ABO tambe lo ofrece den e proximo aña, un programa di screening pa boca di matris (BOCA) y cancer di tripa (CORESA).
BOCA ta nifica BevolkingsOnderzoek Cervix Aruba. CORESA cu ta nifica Colorrectal Screening Aruba, a ser funda originalmente door di tres pionero, dr. Franca, dr. Ho-Kang-You y dr. Smit, awo ta ser re-introduci como e nomber oficial di e programa di deteccion di cancer di tripa.
“E cambio di nomber y expansion ta subraya e compromiso cu salud di nos communidad completo”, sra. Janice Ho-Kang-You – Arends, presidente di e Hunta di Supervision di Fundacion ABO a elabora. “Cu nos socionan, nos ta enfoca tur esfuerso na mehoracion di calidad di bida danki na deteccion na tempo”.
E paso aki ta posibel, danki na colaboracion cu socionan manera hospital HOH, UO-AZV, DVG y socionan tecnico manera Medical Phit, ITP Caribbean, Eclectic Advisory y RADventure y sin lubida di menciona nos socio den calidad LRCB.
Tocante Fundacion ABO
Fundacion ABO, anteriormente yama Fundacion BOB Aruba, ta comprometi na e deteccion na tempo di cancer di pecho, cancer di boca di matris y cancer di tripa na Aruba. Desde 2016, e fundacion a realisa mas di 43 mil screening y ta continua traha pa un futuro mas saludabel pa e comunidad di Aruba.
Actualmente, e fundacion ta ocupa cu e ultimo preparacionan pa e inicio oficial di e programanan nobo di deteccion pa asina por cuminsa screening den e di dos trimester di 2025.
Nos ta determina pa organisa tur cos cuidadosamente pa e programanan funciona di un manera mas optimal posibel. Nos lo tene pueblo bon informa tocante e rekisitonan di cada programa y tambe con por registra pa por participa cu e programanan di screening. Keda pendiente pa mas informacion actualisa pa ta bon prepara ora e momento yega cu e servicionan aki ta disponibel pa nos comunidad.
Pa mas informacion, por sigui Fundacion ABO riba red socialnan conocir.
