PROME MINISTER A DUNA BONBINI NA E MIEMBRO NOBO PA ARUBA DEN CAFT Y A GRADICI MIEMBRO SALIENTE

Durante un recepcion ameno,

Miembro nobo pa CAft ta haya Aruba den un transformacion financiero positivo compara cu deficit grandi na aña 2018

ORANJESTAD – Dialuna 30 di september a tuma luga un recepcion na Aruba Surfside Marina pa duna bonbini na e miembro nobo pa Aruba den CAft, señor Marion Agunbero y dispidi di e miembro saliente señora Hellen van der Wal. A trata di un anochi ameno unda Prome Minister Evelyn Wever-Croes a duna un discurso contando un tiki di e historia y carera di e dos miembronan.

Señora Hellen van der Wal tin un historia amplio den e aparato gubernamental di Aruba. Entre otro, señora van der Wal a traha cu Raad van Advies y tin conocemento amplio di e situacion financiero y procesonan di presupuesto di Aruba. Socialmente, señora Van der Wal tawata hopi activo tambe den comunidad y entre otro ta co-fundador di Telefon pa Hubentud.

Señor Marion Agunbero ta e miembro nobo pa Aruba den e Colegio di Supervision Financiero pa Aruba (CAft) desde 1 di augustus 2024. Conseho di Minister di Reino a aproba riba dia 21 di juni 2024 e proposicion di Aruba pa nombra señor Agunbero como e miembro nobo. Señor Agunbero tin experiencia amplio den e sector financiero y a ocupa diferente funcionnan na entre otro Banco Central, entre otro como manager seccion di supervision y tambe na Departamento di Finansas, como director. E tabata director ehecutivo di e fondo di pension den e sector di turismo di Aruba y a ocupa diferente posicionnan na Caribbean Mercantile Bank N.V., entre otro como Assistant Managing Director Retail Products.

Prome Minister a menciona cu esakinan ta caracteristanan y experiencia cu Gobierno di Aruba ta busca awor den e miembro di CAft ya cu Aruba ta bibando otro tempo compara cu ora señora Van der Wal tawata miembro pa Aruba. E ley cu na e momento aki Aruba ta trahando cu ne a wordo traha desde e tempo ey na 2018, pero mester sigui atene na dj’e, a pesar cu awor Aruba ta den un situacion hopi miho. Na aña 2018, tempo cu señora van der Wal a bira miembro, pais Aruba tawatin un deficit financiero grandi y un debe nacional hopi halto. Actualmente Aruba a pasa den un transformacion financiero grandi y tin surplus financiero y e debe nacional ta bahando rapidamente.

Na final di e discurso Prome Minister a menciona cu ta un honor pa Gobierno di Aruba di por presenta e miembro nobo señor Marion Agunbero. Y den nomber di Gobierno di Aruba, e mandatario a gradici señora Hellen van der Wal pa e bon trabou cu el a haci como miembro den CAft den nomber di pais Aruba, y a desea señor Agunbero hopi exito den su funcion nobo.