Durante Fiesta Tipico den Bario na Centro di Bario Noord: Minister Maduro ta brinda reconocenento na Sr. Erick Uchman

Diadomingo pasa Minister Maduro di Cultura tabata presente un biaha mas na e Fiesta Tipico den Bario cu ta wordo organisa desde maart 2023 pa Fundacion Union Tipico Rubiano UTR, cu e meta pa promove nos musica Tipico den nos dushi barionan di Aruba y asina mantene nos folklore bibo y traspasa esaki pa e generacionnan mas hoben. Durante e fiesta aki ta e custumber cu Minister di Cultura ta reconoce un baluarte di e bario. E biaha aki na Centro di Bario Noord a toca Minister Maduro e placer pa brinda un reconocemento na sr. Erick Uchman pa su contribucion y dedicacion pa mantene y promove nos musica cultural.

Aki ta sigui e discurso di Minister Maduro na ocasion di reconocemento di sr. Erick Uchman.

“Sr. Erick su biografia di bida ta un testimonio di dedicacion, di entrega, y di amor pa e comunidad Arubano. Despues di 35 aña di servicio militar Hulandes, Sr. Uchman a tuma e decision di bay cu pensioen y hunto cu su casa sra. Diana a bin establece su mes na Aruba y bira parti di nos comunidad Arubano.

Durante su hubentud, Sr. Erick ta haya su formacion escolar na Abraham de Veer School y Juliana School. Su pasion pa musica a florece for di tempran, e ta siña toca sinfonia di boca na e edad di 11 aña, sigui despues pa siña toca acordion cu su 15 aña. Un instrumento cu e ta sigui toca te cu awe. E talento musical di Sr. Ericka florece na tal manera cu el a forma parti di varios grupo musical conoci manera Tipico Arco Iris y actualmente e ta forma parti di Tommy y su Grupo. Sr. Erick a comparti escenario (tarima) musical cu legendarionan Arubano manera Etty Toppenberg den feliz memoria, Patan Farro, Chonai Faro, Nito Franken, Boysie Croes den feliz memoria y Tommy Figaroa.

Ta un costumber cu tabata duna presentacion ribacelebracionnan di Dia di Mama, Dia di Tata, Dia di Himno y Bandera, Dia di Betico, Pasco y Dia di San Juan-Dera Gay.

Erick, no solamente su maestria musical ta algo notabel, pero su spirito generoso di servicio ta digno di aplauso. Durante e añanan, Sr. Erick a contribui incansablemente na varios organisacion y institucion, na e.o. Centro Kibrahacha, FAVI, Cas Marie, Imeldahof, Misa di Noord, Cayena Kleuter School, Kerki Protestant, St. Michael Paviljoen, Respaldo, Ambiente Feliz y Cas di Machi y hopi mas. Su musica a yega na e curazon di muchanan, grandinan, como tambe esnan cu ta lucha cu desafio, y e manera cu Erick ta comparti su musica cu un sintimento profundo, ta algo cu lo keda den nos memoria colectivo.

Den e epoca di pandemia Covid, Sr. Uchmann, hunto cu grupo musical, a bishita nos grandinan isola den nan cas, usando su talento pa keda uni y combati e soledad. Su participacion den e Concierto Donny Laclé y e famoso “Caha di Glas” a duna oportunidad na hobennan cu talento pa haya e apoyo financiero necesario pa sigui nan trayecto musical.

Pero Sr. Erick su entrega no ta limita na musica so. Como un pensionado cu un spirito di servicio, el a dedica hopi ora pa asisti y yuda organisacionnan comunitario y deportivo (manera Animal Shelter, Sanctuario di Burico, Imelda Hof, IDEFRE, den e area deportivo, e ta fundador di Liga Mini Baby y Baby den futbol, dirigente /entrenador di Olympico, Nacional, Mercurius, Aruba Juniors).

Sr. Erick, bo bida ta un ehempel di entrega total na nos comunidad. Awe hunto cu tur esnan presente nos ta honra bo legado, no solamente como un musico talentoso, pero como un lider cu ta inspira un generacion pa sigui bo pasonan. Cu hopi emocion y gratitud, na nomber di nos Pueblo y Gobierno, nos ta reconoce y gradici bo pa tur e dedicacion cu bo a mustra. Masha masha danki pa tur loke bo a haci y ta sigui haci na mantene y promove cultura di nos pais.”

Minister Maduro ta felicita y gradici Fundacion UTR, tur grupo tipico y tambe UNOCA pa otro bunita Fiesta Tipico den Bario. E mandatario ta gradici tur cu tabata presente pa disfruta di nos dushi musica tipico. Cultura bo tin cu bib’e y cu bo participacion nos ta engrandec’e.