Minister Dangui Oduber a duna apertura na “Iron Order Motorcycle Club Aruba” su “Bike Ride”
ORANJESTAD – Diasabra den oranan di atardi Minister di Turismo Sr. Dangui Oduber tabata na e parking lot di SIAD caminda e la keda invita pa haci e apertura di e “bike ride” cu a keda organisa pa “Iron Order Motorcycle Club Aruba”. E “bike ride” aki a wordo organisa en conexion cu Aruba su celebracion di dia di Himno y Bandera. A yega Aruba un gran cantidad di bikers “Iron Order Motorcycle Club Internacional”cu a bini for di Merca, Corsou, Boneiro, Alemania y Surinam. Diadomingo a tuma lugar e Camacuri “national bike ride”, cu tambe nos bishitantenan a compaña.
Minister Oduber a menciona cu “Iron Order Motorcycle Club Aruba” a acerca su Ministerio pa un ayudo financiero pa haci e “bike ride” aki posibel mirando cu e ta algo grandi y esaki tin su gastonan cune. Mirando con bon organisa esaki tabata y e gran cantidad di turistanan “bikers” cu esaki lo trece cune, mesora Minister Oduber a bay di acuerdo pa duna un ayudo financiero mirando e impacto positivo cu esaki lo tin den Aruba su economia. E turistanan aki ta keda den nos hotelnan, nan ta bay restaurant, tiendanan y ta gasta den nos economia.
Minister Dangui Oduber ta gradici “Iron Order Motorcycle Club Aruba” pa organisa e bunita “bike ride” akin a manera voluntario, danki pa yuda den e recuperacion di Aruba su turismo y economia. Aruba ta e perla den Caribe pero ta su hendenan cu semper a sa di mustra nos bishitantenan un bon hospitalidad ta haci e tipo di eventonan aki posibel. Na mes momento a felicita tambe Camacuri bikers cu nan anniversario di 25 anja organisando bike rides na Aruba.
