Lider di AVP, mr. Mike Eman: DENTRO 100 DIA GOBIERNO DI AVP LO PONE PAKETE DI REMEDI COMPLETO ATROBE !

“Caranan di nos hendenan preocupa cu remedinan cu nan no por paga ta riba nos mente continuamente. AZV semper tabata su intencion pa cubri un pakete basico y acceso na bon cuido. Locual Gbinete Wever Croes a corta den pakete di AZV ta inhusto. P’esey un gobierno di AVP dentro di 100 dia di un gobierno nobo lo pone pakete di remedi completo atrobe”. Esaki tabata compromiso expresa dor di e e lider di oposicion, mr. Mike Eman para na pia di e hospital nobo cu su Gabinete a realisa tambe pa Aruba.

Un di e puntonan cu mas tin pueblo preocupa ta e manera con e cobertura di AZV a keda bay atras den e ultimo añanan. Mescos cu tur otro reto cu e famia Arubiano ta confronta awendia, AVP ta para banda di e ciudadano cla pa defende su derecho.

No tin duda cu esaki ta momentonan hopi dificil, mas ainda si bo ta sufri di un kebrante di salud. Mientrastanto sector di cuido medico ta practicamente den crisis, caminda e falta di atencion pa nos ciudadanonan ta sumamente grandi.

Cobertura di tur remedi, warda largo riba afspraak cu specialista y e demotivacion entre e profesionalnan medico, sigur ta entre e puntonan cardinal cu AVP ta comprometi pa atende na momento cu haya e mandato di pueblo pa bolter cos y cuminsa dirigi e pais den un rumbo mas prospero.

Eman: “Nos lo haci e pakete di remedi completo atrobe pa asina persona cu ta sufri di dolor, cu a caba di haya un tratamento den eerste hulp, a bay dentista, etc. haya e remedi esencial pa dolor, cubri bek for di AZV. Mescos cu remedi pa alergia y cu ta proteha stoma di otro tratamento, etc.”

Pa lider di AVP, esaki ta masha simpel, mester bay bek na e esencia di pakico a crea AZV, esta di brinda acceso na e miho cuido posibel pa medio di e miho dokter, specialista, hospital, enfermero, pero tambe e remedinan cu nos hendenan mester. Gabinete di Henny Eman a lanta AZV, mientras cu gobiernonan di MEP a masacr’e. Siguiente gabinete di AVP lo trece bek.

Actualmente un famia, cu ya caba ta sufri di un menor poder di compra, ta hay’e mas dificil si un ta bira malo y ta tarda pa haya dokter y riba dje mester paga di nan mesun saco na botica pasobra AZV ta cubri djis dos di e cinco remedi.

Ciudadanonan regularmente ta comparti nan preocupacion cu mr. Mike Eman y boticarionan ta cont’e con nan ta mira cliente, en particular nos grandinan, ora cu nan no por paga pa e remedinan cu nan mester di dje. “E no mester ta asina. Esaki ta loke nos mester bolter bek, pa AZV bira e pakete completo cu nos pueblo ta spera y merece,” Eman a afirma.

E proximo gobernacion di AVP sigur lo cambia esaki den e prome 100 dia, esey ta e compromiso cu ta haci cu pueblo. “Nos grandinan y tur cu tin un kebrante di salud, cu ta sufriendo pa falta di remedi, lo haya e trato medico husto cu nan merece.”