Cometa unico C/2023 A3 (Tsuchinshan-ATLAS) lo ilumina shelo di Aruba entre mita di luna di october te fin di october!
Den luna di october e amantenan di astronomia na Aruba lo tin e oportunidad pa mira un evento celestial espectacular. Esaki en conexion cu e cometa C/2023 A3 (Tsuchinshan-ATLAS) cu lo pasa den nos shelo for di mita di luna di october te fin di october. Esaki lo ta un oportunidad unico pa comunidad wak un di e cometanan mas briyante di e aña, posiblemente visible, sin nesesidad di uza instrument, si e condicionnan di tempo permiti.
Space and Nature Aruba Foundation ta entusiasma pa anuncia cu Cometa C/2023 A3 lo ta mas visibel despues cu solo baha y si shelo ta limpi na horizonte. E miho dia pa wak e lo ta rond di 15 di october. E cometa lo ta na un haltura abou, riba horizonte west, desde ora di atardi te den anochi. Den e dianan despues di 15 di october, e briyo di e cometa lo ta disminui poco poco; asina ta percura pa no perde tempo y busca pa wak e trempan!
Cometa A3 no ta solamente un cometa unico, pero tambe historico. E no lo bolbe pasa den nos sistema solar pa otro 80,000 aña, haciendo e un oportunidad unico di un bes den bida. E cometa lo por tin un rabo resplandeciente di stof y ijs, cu e posibilidad di dos rabo —un blanco y un blauw—iluminando e shelo di nochi.
Con ta e miho manera pa wak e experiencia unico aki?
1. Busca un luga unda por haya un bista cla di horizonte di west.
2. Evita luz di ciudad of zona di hotel; e lugarnan mas scur lo mehora e visibilidad.
3. Usa binocular of telescopio pa mira e cometa mas cerca, aunke e cometa lo por ta visibel sin ningun instrumento.
Pa haya mas informacion:
Pa mas detaye di e evento celestial aki, incluyendo updates en vivo y conseho pa haci observacion na Aruba, bishita nos pagina di Facebook na www.facebook.com/spacenaturearuba. Aki nos lo comparti informacion alcaso di observacion y conocemento pa yuda bo saca e maximo di e espectaculo aki.
Laga nos sali cu nos binocular of djis un stoel di lama y bini hunto como comunidad, pa asina nos disfruta di e beyesa di e shelo di e anochi aki. Uni na nos y bin celebra cu nos un evento cosmico y espectacular!
