Organisashon di Derecho Humano di Boneiru Ta Asistí na di 79 Asamblea General di Nashonan Uni – Seshon di 4to Komité riba Teritorionan-Sin-Propio-Gobernashon

Organisashon di Derecho Humano di Boneiru, James Finies i Davika Bissessar, orguyosamente a asistí na e seshon di 4to Komité di Nashonnan Uni riba Teritorionan-Sin-Propio-Gobernashon, uniendo den diskushonnan riba futuro di teritorionan manera Islanan Virgines Britániko I Merikano, Polinesia Fransés, Nueva-Caledonia, i Guam, entre otro.

Nos presensia ta subrayá nos kompromiso firme pa lucha pa e derechonan humano I di outodeterminashon di Boneiru i pa konsientisa riba e desafionan di derecho humano ku ta afektá e pueblo di Boneiru.

Boneiru ta enfrentando desafionan úniko, i nos ta kere ku pone Boneiru bèk riba lista Nashonan Uni komo un Teritorio-Sin-Propio-Gobernashon i nos kompromiso kontinou ku organisashonnan global manera Nashonnan Uni ta krusial pa garantisá ku nos isla su preokupashonnan i aspirashonnan ta skucha i trata.

Bonaire Human Rights Organization ta kontinua komprometí pa aktivamente partisipá den diskushonnan aktuál i di futúro den foronan internashonal pa protehá nos derecho pa propio-gobernashon i pa fortalese e base di derecho humano ku ta sostené nos komunidad.

Nos lo kontinua preshona pa Nashon Uni i komunidad internashonal tene Hulanda responsabel i pa akshonan signifikativo, ku ta respetá e identidat kultural, derechonan, i desaroyo di Boneiru mientrastantu nos ta avansá riba e kaminda pa pone Boneiru bek riba lista di Teritorionan-Sin-Propio-Gobernashon I respeta nos derecho di autodeterminashon.