Ultimo periodo di e Encuesta “Entrada y Gastonan 2023-2024” di CBS

Manera ta conoci, Oficina Central di Estadistica (CBS) a inicia den e luna di October 2023 cu e Encuesta di Entrada & Gastonan. Entrante 16 di October 2024 lo tuma lugar e ultimo periodo di e encuesta aki pa asina nos por completa e ciclco di 1 aña di investigacion riba e Entrada y Gastonan di hogarnan.  Esaki segun recomendacion internacional y cu e obhetivo di bishita entre 1,500 y 2,000 hogar. Te cu periodo 11, un total di 1764 hogar parti over di full Aruba a completa e encuesta. Asina aki por haya un bista representativo di tur tipo di hogar cu ta residencia den tur Area di Aruba.

E encuesta aki ta sumamente importante ya cu e informacion colecta lo wordo usa pa, ente otro, pa determina e macuto di compras riba cual CBS ta monitorea e prijsnan na Aruba pa asina por determina e inflacion. A base di e gastonan di tur e hogarnan encuesta, ta calcula tambe e peso di cada producto y/of servicio cumpra.  Tambe CBS lo por duna un bista di con e patronchi di consumo di nos poblacion a cambia durante e ultimo ocho añanan desde e ultimo Encuesta di Entrada y Gastonan cu a tuma lugar na 2016.

Ultimo periodo

E ultimo periodo di e encuesta ta cuminsa 16 di October 2024. Manera ta custumber, cada encuestador(a) lo wordo apunta un area specifico di adres pa nan bishita. E hogarnan cu ta bay di acuerdo pa participa lo wordo bishita durante un periode di 2 siman pa asina por asisti e hogar pa jena e buki di gasto diario. Un encuestador(a) ta traha den siman y den weekend entre 8 or di mainta pa 8 or di anochi, pero naturalmente ta depende di e dia y orario cu un hogar ta disponibel y cu e afspraak cu wordo haci cu e encuestador(a).

CBS kier enfatisa un biaha mas cu e datonan compila durante e encuesta, mescos cu tur otro encuesta di CBS, ta wordo procesa completamente anonimo. Y cu tur encuestador(a) di CBS tin un badge y un uniform pa identifica nan mes debidamente. Si acaso un encuestador(a) no tin su uniform bisti, semper e lo por identifica su mes cu su badge.

Nos ta gradici tur hogar cu ya caba a coopera cu e Encuesta di Entrada y Gastonan y alabes ta sigui pidi e bon cooperacion di tur hogar pa e ultimo periodo cu falta. E exito di e encuesta di Entrada y Gastonan 2023-2024 ta depende di e cooperacion di un y tur.

Pa cualkier pregunta di e Encuesta di Entrada y Gastonan 2023-2024, por tuma contacto cu Oficina Central di Estadistica, durante oranan di oficina na 524-7433, y puntra pa cualkier miembro di e team di e encuesta. Tambe por manda un e-mail na cbs@setarnet.aw