A.T.A.: World Explorer Cruise ta haci su prome bishita na Aruba
‘Un yate crucero luhoso opera pa Mystic Cruise’
Na comienso di oktober 2024, cu un bishita tan anticipa, Aruba a ricibi pa prome biaha e yate crucero luhoso World Explorer. Pa celebra e bishita y un meta importante pa e industria crucero local, a conta cu un ceremonia di intercambio di placa abordo di e yate. Esaki como un simbolo di un Bon Bini caluroso na World Explorer y su tripulacion.
Durante di e ceremonia por a conta cu presencia di Capitan Adrian Medina, hunto cu e ekipo di tripulacion di e crucero, Marc Figaroa CEO di Aruba Ports Authority, Mario Arends Chief Commercial Officer di Aruba Ports Authority, Monica Bos Cruise Manager di Aruba Tourism Authority, y representantenan di Port Agency Maduro & Sons.
World Explorer, opera pa Mystic Cruises, ta conoci pa ofrece di exibicion luhoso na algun di e destinacionan mas espectacular di mundo. E crucero ta diseñá pa huespednan cu ta busca un experencia inolvidabel y den naturalesa. Cu un capasidad pa dos shen huesped, World Explorer ta provee un ambiente intimo y luhoso, cu comodidadnan moderno cu ta inclui un centro di fitness, plataforma di observacion, y restaurant di clase ‘fine dining’.
Normalmente, World Explorer ta nabega na destinacionan manera Antartico, Arctic y otro lugarnan fuera di e ruta comun, caminda huespednan tin e oportunidad pa explora e medio ambiente, fauna, y paisahe di e pais a traves di excursion guia y charla dirigi pa expertonan den e area. E yate ta ekipa cu sistema di nabegacion avansa y tin e habilidad pa nabega den awanan cu desafio, mientras ta mantene un nivel halto di comfortablidad pa su huespednan.
E intercambio di placa ta un tradicion maritimo cu ta simbolisa bon intencion y cooperacion. E ceremonia di bishita inicial aki ta destaca e esfuersonan continuo di Aruba pa diversifica su ofertenan di turismo pa keda atrae liñanan di crucero luhoso y di primera calidad.
E yegada recien di e yate crucero luhoso World Explorer, cu un capacidad intimo y cu un enfoke ambiental responsabel ta alinea perfectamente cu e vision di Aruba. Aruba ta comprometi pa atrae un turismo High Value – Low Impact, cu ta un turismo di balor halto y cu menos impacto. Enfocando riba biahenan sostenibel cu ta preserva e bunitesa natural di e isla mientras cu ta brinda experencianan inolvidabel.
