MIGUEL MANSUR (ACCION21): NO PURBA DESACREDITA NOS REFORMA ELECTORAL A BASE DI CONOCEMENTO HURIDICO ERONEO

Dialuna 14 october 2024 ACCION21 a entrega un inciativa di ley pa reforma nos sistema electoral, parti di e ley ta un landsverordening y e otro parti ta un cambio na staatsregeling. Prome cu nos a entrega e reforma electoral nos a cuminsa anuncia cu nos kier extende e derecho di voto na Arubano den exterior. Tabata tin reaccion di algun partido cu a surgeri cu por extende derecho di voto na studiante si nan kier bolbe, un surgerencia ridiculo. Mas cu 140 pais na mundo ta extende derecho di voto na ciudadano residencia den exterior, den niun e derecho ta depende riba nan intencion di bolbe, bo por imagina e dificultad den colecta y verifica tur e informacion ey?

Dialuna 21 october 2024 a keda publica un columna den Bon Dia Aruba cu ta purba desacredita nos iniciativa di ley. Su prome punto di argumento ta cu pa extende derecho di voto na Arubano den exterior mester cambia constitucion. Esaki ta un pregunta cu ami tambe tabata tin pa e cuatro wetgevingsjuristsnan cu a traha riba e inciativa di ley. Constitucion ta establece un minimo, no un maximo, dus semper por extende un derecho mas leu cu staatsregeling ta prescribi. Berdad Hulanda a hancra e derecho den nan constitucion pero nos a opta pa cuminsa cu un landsverordening paso esey ta mas facil pa pasa mirando cu mester unicamente un mayoria simpel di diesun. Despues kisas lo kier hancra e derecho den constitucion, pero e no ta necesario pa duna Arubano den exterior e derecho di voto

E segundo argumento den e columna ta tocante introduci eleccion primario of pre-eleccion manera ta e caso na Corsou. Ta importante nota cu Aruba su kiesverordening, nos leynan electoral, tabata mescos cu esun di Antias. Na Corsou nan a introduci pre-eleccion pasobra originalmente den ley tur hende cu bay duna sosten di firma por mira e lista di ken a firma pa e partido prome cu nan. Esaki tabata e caso na Aruba tambe prome cu digitalisacion y cambio na nos leynan electoral. Corsou su pre-eleccion tabata motiva pa garantisa anonimidad pero a bin resulta cu e ta util pa descarta partidonan cu no tin sosten suficiente pa sigui pa eleccion pa parlamento. Den ultimo eleccion na Corsou tabata tin 23 partido, 7 tabata den parlamento y 16 cu no tabata den parlamento mester a bay pre-eleccion. Contrario na loke e columna ta trece dilanti, na Corsou no tin necesidad di busca sosten di firma paso pre-eleccion a reemplasa esey. E barera a keda mescos, mester sosten di por lo menos 1 porciento di e cantidad di voto den ultimo eleccion, pero luga di e sosten tuma luga via firma durante 7 dia habil, e mester sosode via voto den pre-eleccion. Diesseis (16) partido a participa den pre-eleccion cu ta tuma luga riba un diasabra y diadomingo, dos siman despues di entrega lista.

Ocho (8) partido a ricibi mas cu 1 porciento di e cantidad di voto den ultimo eleccion y por a sigui pa eleccion pa parlamento. Dus di 23 partido, 15 a cualifica pa eleccion pa parlamento, 7 tabata tin representacion caba den parlamento y 8 a gana pre-eleccion. Di e 15 partidonan cu a participa na eleccion 2021, 6 tabata victorioso den gana un of mas asiento pa representacion den parlamento.

Mirando e cantidad creciente di partidonan na Aruba y e practica di e partidonan tradicional di manda nan hendenan firma pa partido chikito pa crea mas restzetels, introduccion di pre-eleccion tin varios bentaha. E ta crea e oportunidad pa partidonan cu mas sosten participa den eleccion pa parlamento asina sigurando cu mas voto ta representa. Tambe e ta diminui e practica di manda sostenado di partido tradicional firma pa un partido chikito pa crea mas restzetels. Nos ta lamenta cu luga di sostene nos iniciativa di ley, cierto partido kier purba desacredita nos ley a base di conocemento huridico eroneo. Nan ta purba desacredita nos logronan simplemente paso nan no tabata tin e mesun exito.