Parlamentario Alvin Molina : Prioridad pone San Nicolas bek riba mapa di Aruba.

Afspraak ta afspraak, un dicho cu mi a scucha na varios ocasion den fraccion, den coalicion y den gobierno. Sigur un bon principio como e base ora ta traha cu otro pa tene bo mes na palabracion. Un afspraak cu nos no mester perde for di bista, ta esun cu a wordo oficialisa na Nicolaas Store dia 19 augustus 2021, entre e partidonan den coalicion pa cu Pueblo di Aruba. E afspraak pa inverti den desaroyo di San Nicolas, saca San Nicolas for di e abismo pa decada largo y pa San Nicolas un biaha mas por contribui positivamente na economia, bida social y cultura di Aruba. Aruba merece esey! Tur sorto di motibo a wordo menciona dicon ainda desaroyo macro no ta wordo mira pariba di brug. Mi mes ta pushando varios proyecto cu ainda no por mira su frutanan. Gobierno a cay…ta con ta sigui awo.

Partido MEP a anuncia 7 prioridad cu lo enfoca riba dje den e temporada nos dilanti. E puntonan ta, entre otro, costo di bida, salubridad y nos grandinan. Cada un ta punto sumamente importante!! Pa colmo, ta danki na maneho financiero responsabel, awo tin espacio bek pa inverti den tur e puntonan aki, pero no lubida e afspraak di dia 19 augustus 2021. Pesey mi peticion na Lider di Partido MEP ta pa agrega prioridad #8 Pone San Nicolas bek riba mapa di Aruba. Mi a entrega varios mocion tocante oportunidad pa desaroyo pariba di brug, entre otro, percura pa e hotel di berdad trece desaroyo positivo pa San Nicolas, drecha Carnival Village y organisa un desaroyo radical pa area di “mainstreet”. Ban tuma bos di pueblo na serio y tene nos mes na afspraak.