Aruba Tourism Authority (A.T.A.) cu reunionan importante na Europa‘A enfoca entre otro riba mercado potencial nobo: Suisa’

Durante di siman, Aruba Tourism Authority, Ronella Croes – CEO , y Sanju Luidens – Chief Marketing Officer, como tambe Tirso Tromp – Area Director di e region y representantenan di Italia, Alemania, Hulanda y Belgica a atende un serie di reunionan importante cu ta enfoca riba promocion y colaboracion turistico. Reunionan cu a inclui cu e revision di e plan pa 2025, y reunionan cu socionan strategico y agencia di publicidad di A.T.A. pa Europa.

Como parti fundamental, A.T.A. a conta cu un reunion cu compania aereo KLM, unda a reuni cu Bas Geressen – Director di KLM Hulanda, Jurian de Vogt – Network Planning, Marjolein Kesselaar – Marketing Executive KLM Hulanda, y David Vinke – Commercial Director Benelux. Como aerolinea nacional di Hulanda cu ta opera for di Schiphol, KLM ta conta cu varios vuelo cu ta conecta diferente pais Europeo cu Aruba. Obhetivo di e reunion tabata pa fortalece y explora colaboracion y strategia entre A.T.A. y KLM pa promove Aruba como un destinacion preferi pa turistanan Hulandes y Europeo. Alabes a evalua kiko ta capacidad di asiento aereo cu ta spera pa 2025 y na ki momento por amplia esaki y  cambia tipo di avion cu ta bula pa Aruba, pa asina inclui entre otro e clase comfort premium. Cua capacidad di asiento aereo proyecta pa 2025 na es momentonan aki, esaki ta mustra mas capacidad pa Aruba. A toca e tema di desaroyo y futuro KLM en general como tambe di Aruba. 

E di dos socio mas grandi na Hulanda pa cu biahe y vacacion ta e compania TUI. A reuni cu Arjen Kers Managing Director TUI Hulanda y Belgica, Rob Oostendorp – Product Director Long Haul, y Katrina Vansteenkiste – Account Manager Belgica y Hulanda riba diferente punto y continuacion di un colaboracion fuerte entre A.T.A. y TUI pa promove Aruba como un destinacion preferí bou di turistanan Hulandes. Durante e reunion, a discuti oportunidadnan pa atrae mas huesped di calidad pa Aruba. Aki por pensa entre otro riba enfoke riba e segmento di golf. Pa 2025, TUI lo conta cu dos vuelo semanal entre Aruba y Hulanda. Tambe a papia di e panorama general pa 2025 y di oportunidadnan riba area di promocion y mercadeo. 

Como parti di e strategia di diversificacion di A.T.A. y di atraccion di huesped di calidad halto, a investiga e mercado Suiso na 2023. A base di esaki a dicidi di traha riba e mercado aki tambe y lansa esfuersonan pa amplia esaki. Como tal a cumpli cu un bishita na Suisa, Zurich, unda cu a sigui enfoca riba conexion aereo for di e mercado aki. Ta trahando riba posibilidadnan pa cu vuelo for di e pais aki, unda lo por conecta no solamente Suisa cu Aruba, pero tambe otro paisnan manera Alemania y Italia. Zurich ta un hub importante pa aviacion y turismo, y ta ofrece un oportunidad unico pa engrandece e lazo entre Aruba y Suisa.

Otro reunionan sosteni a inclui cu agencia di publicidad y strategia digital pa A.T.A. na Europa. Cu oficina principal na Amsterdam, DEPT ta un agencia digital internacional.  A entre otro identifica oportunidadnan pa utilisa tecnologia y data pa mehora e atraccion di huespednan di calidad cu ta bishita Aruba. 

Por ultimo a sostene reunion cu e ekipo di A.T.A. Europa y tur representantenan di diferente mercadonan na Europa, esta Italia, Alemania, Hulanda y Belgica, y Inglaterra. A recapitula strategia y accionnan y revisa resultado y djey planan pa 2025.