Minister demisionario Geoffrey Wever: Inflacion den 2024 ta mas abao cu 2023

Minister Geoffrey Wever ta anuncia cu e indice di prijs di consumo den september 2024 ta mustra un caida di 0.4% cu e indice di augustus 2024. E inflacion pa ultimo 12 lunanan di september 2023 te cu september 2024 ta 1.5%. Durante e mesun periodo di aña pasa, inflacion tawata 1.7% cu ta un caida di 0.2%. Tur luna Oficina Central di Estadistica (CBS) ta publica e resultadonan principal di e Indice di Prijs di Consumo (CPI).

Pa loke ta e promedio annual, pa e ultimo 24 luna, periodonan di september 2021 te cu september 2022 y september 2023 te cu september 2024 e inflacion ta 2.0%. Compara cu e periodonan di september 2020 te cu september 2021 y september 2022 te cu september 2023, den cual e promedio anual tawata 4.5%, esaki ta mustra un caida di 2.5%

Durante e luna di september, shete di e diesdos sectornan a registra un caida den nivel di prijsnan. Sectornan cu tawata tin un efecto mas grandi riba e caida den inflacion tawata e sectornan di “Mobilario” (-2.7%) y “Transporte” (-1.0%). E sector di “Paña y sapato” a registra un subida den e indice di 4.6%.

Aruba como isla chikito ta importa mayoria di productonan pa consumo. Inflacion den nos partnernan mas importante, Merca y Hulanda ta mustra te cu luna di september un inflacion di 2.4% y 3.5% respectivamente.

E Canasta di consumo ta consisti di 408 producto y servicio. CBS riba un base continuo ta monitor y publica e cambio di prijsnan di e canasta di consumo. E publicacion ta uno detaya y ta duna un bista riba e desaroyo di prijsnan di diferente producto y bienes.

Minister di Asuntonan Economico, Comunicacion y Desaroyo Sostenibel, mr. Geoffrey Wever, ta gradici CBS pa e trabao mensual di publico e desaroyo di nivel di prijsnan na Aruba y ta invita tur ciudadano pa bishita e website di CBS www.cbs.aw pa mas informacion.