Let’s Move for Mental Health 5th Gold Mine Walk and Run un gran exito
Oranjestad – Riba diadomingo 20 di oktober 2024 a tuma lugar e di 5 edicion di e Gold Mine Walk and Run, cual e aña aki tabata tin como tema: “Let’s Move for Mental Health” cual a surpasa tur expectativa di e organisadornan y participantenan.
E evento aki a wordo organisa danki na e union di diferente organisacionnan na Aruba cu ta comparti e mesun vision, yuda nos comunidad pa tin um miho bida for di e punto di salud mental. E organisacionnan cu a uni ta: Respaldo, Stichting Hunto, FADA y Healthy Lifestyle.
E “Gold Mine Walk and Run” a cuminsa 5 aña pasa cu apenas 200 participante y a keda crece tur aña. Awe, nos ta increiblemente orguyoso pa bisa cu riba diadomingo 20 di oktober 2024 a logra haci un evento cu mas di 750 persona, cual ta inclui participante y voluntarionan. Tur e personanan aki a bini hunto pa un causa importante, move pa asina yuda e salud mental. E ta inspirante pa mira con comunidad a brasa e evento. Sigur e exito aki no por a wordo logra sin ayudo di e partnernan fenomenal. Masha danki na tur hende cu a kere den e iniciativa aki y pa yuda nos haci un cambio real.
Un danki special ta bay sigur na Patrishi Sports cual a inicia e evento aki 5 aña pasa y a laga e organisacionnan di salud mental tuma esaki over pa e aña aki.
Salud mental ta algo cu por toca nos tur y door di core, cana y move hunto, nos ta sigui manda e mensahe cu ta ok pa busca ayudo y cuida nos mesun bienestar. Ban sigui haci e esfuerso pa kita e stigma y pa mantene e conversacion bibo!
Un felicitacion grandi ta bay na e ganadornan, pero en especial na tur persona cu a participa y asina a tuma un tempo pa nan mes y nan salud mental.
Por ultimo un danki na: Subway, Tropic Ale, Aruba Tourism Authority, Setar, High Performance, Playa Linda, Banco di Caribe, Super Food, Benu Pharmacy, Smit & Dorlas, Gianni’s Group, De Palm Tours, Aruba Aloe, De Wit & Van Dorp, Tri-Bike, Backstage Footfit, Cuts and Curves, Fisherman’s Hut, Blue Sports y Ling & Sons Food Market pa e gran apoyo. Tambe na 297Sports y Rex Aruba pa e bunita potretnan.
Na nomber di Respaldo, Stichting Hunto, FADA, Healthy Lifestyle y Patrishi Sports, un biaha mas danki Aruba y nos ta invita e comunidad pa keda activo y sigui tur nos plataforma di medionan social pa siña mas tocante con por keda mentalmente sano.
