Respaldo ta anuncia cambio di localidad pa Policlinica di Adulto

Oranjestad – Respaldo kier informa comunidad di Aruba cu su Policlina di Adulto lo muda su servicionan for di Mahuma pa su localidad banda di Horacio Oduber Hospital cuminsando for di diamars 5 di november 2024. Cu e cambio aki Policlinica di Mahuma lo ta cera pa publico riba diabierna 1 di november 2024 y Policlinica banda di Horacio Oduber Hospital lo ta cera riba diabierna 1 di november y riba dialuna 4 di November 2024. Tur esaki pa permiti e mudansa y adaptacion di e edificionan.
Tambe kier informa cu e Policlinica di Mucha y Hoben lo keda na e edificio di Mahuma. Por fabor tene na cuenta cu for di dialuna 4 di november 2024 e entrada lo ta na e parti dilanti di e edificio.
E cambio aki tambe ta parti di e Aspiracion 2030 cu Respaldo a presenta recientemente na su stakeholders. Cu esaki hopi cambio lo ta na caminda. Asina tin plannan pa no solamente brinda un miho servicio na e comunidad di Aruba den e area di Salud Mental, pero pa eleva e calidad di e servicio en general, como tambe riba tereno di sostenebilidad y inclusividad den Salud Mental. Ta di suma importancia pa cuminsa cu e trabou internamente unda cu e empleadonan ta central y ta hunga un rol hopi importante pa na final Respaldo por brinda nos comunidad e servicio di calidad cu ta necesario.
Respaldo ta agradeci pa e comprension y colaboracion di tur persona cu ta uza e servicionan aki y ta pidi disculpa pa cualkier inconveniencia cu esaki por trece cu ne.
Por ultimo Respaldo kier invita comunidad pa keda sigui su rednan social cual ta Facebook, LinkedIn y Youtube, Respaldo Aruba, pa mas informacion.

“Rumbo pa un organisacion di salud mental specialisa profesional y sostenibel pa un Aruba mentalmente sano.”