Prome Minister Evelyn Wever-Croes: Embahadora di Colombia na Hulanda a reuni cu Prome Minister
ARUBA PRONTO POR IMPORTA CARNI DI COLOMBIA
“Cu bon liderazgo, trabou duro y sincero bo ta obtene logronan grandi”
ORANJESTAD – Diahuebs mainta 31 di october Prome Minister Evelyn Wever-Croes a reuni cu Embahadora di Colombia na Hulanda, señora Carolina Olarte Bácares acompaña pa Consul General di Colombia na Aruba, señor Gustavo Serrano Amaya. E reunion a trata di diferente punto di interes comun entre Aruba y Colombia.
Seis luna pasa e Embahadora ya tawata na Aruba unda durante un bon reunion cu Prome Minister varios punto a wordo treci padilanti particularmente e cooperacion entre Aruba y Colombia, y e tema di importacion di carni for di Colombia. Durante e lunanan despues di e reunion menciona, Gobierno, bou liderazgo di Prome Minister a sigui cu e proceso trahando den diferente comisionnan mixto entre Aruba y Colombia y awor por mira bek riba logronan grandi. E logro mas importante pa Aruba ta cu pronto por importa carni di baca, porco y galiña for di Colombia.
E negociasionnan ta den estado hopi avansa y e siguiente paso ta trata di e decreto cu mester wordo traha pa por legalisa e cuadro aki. Cu esaki, proximamente importadornan di carni na Aruba por tin e posibilidad di importa carni di baca, galiña y porco for di Colombia. Esaki lo significa cu e prijs di e carni lo baha considerablemente cual lo ta un alivio grandi pa henter pueblo di Aruba.
“Esaki ta un bon muestra cu ora traha hunto cu intencionnan serio y sincero, bo ta logra cosnan grandi. Pa hopi tempo no tawata posibel importacion di carni for di Colombia pero pronto esaki lo ta un realidad, danki na e esfuersonan y e trabou duro cu Gobierno di Aruba ta bin ta haciendo semper pensando riba e bienestar di tur ciudadano di pais Aruba”, Prome Minister a indica.
