ARUBA A CELEBRA DIA DI HIMNO Y BANDERA NA GRANDI
“Ohala cu e mesun amor y patriotismo aki inspira nos pa nos uni pa hiba nos pais padilanti”
Celebracion di nos dia nacional, Dia di Himno y Bandera fin di siman tras di lomba tawata hopi bunita na unda cu pueblo di Aruba a sali y celebra na grandi. E celebracionnan a cuminsa ya caba luna pasa cu e Parada Nacional, Cend’e Mecha 2023. E luna aki tabata tin e Concierto Cultural Nacional, e Festival Canto na nos Himno y Bandera, e Manifestacion Cultural dia 17 di Maart anochi cu tabata sumamente bunita, e Acto Protocolar dia 18 di Maart y esaki a wordo culmina cu e desfile di tur e gruponan uniforma cu mas o menos 635 participante den e gruponan di scouting so.
Diabierna dia di nos simbolonan nacional, tawata tin ambiente di celebracion ful rond di Aruba. Diferenent luganan a organisa actividadnan cu Aruba semper tawata tin costumber di nan. Casnan a hisa bandera, of a decora pa asina mustra e patriotismo di e Arubano orguyoso di tin su simbolonan di identidad. Prome Minister Evelyn Wever-Croes a expresa cu e echo cu Aruba ta saliendo di e pandemia, a yuda cu hopi ciudadano a sali y celebra e dia aki despues di dos aña di a celebra na un manera diferente.
“Loke por a constata tabata un ambiente hopi positivo, di alegria y di hopi patriotismo. Mi ta kere nos mester duna nos mes un gran elogio pa e forma grandi cu nos a sali y celebra, cada un na su manera, nos dia nacional”, Prome Minister a remarca.
Prome Minister, den conferencia di prensa di Gobierno di Aruba dialuna mainta, a gradici den nomber di Gobierno di Aruba, den nomber di Aruba, tur esnan cu a haci tur e celebracionnan aki un exito rotundo. Un gradicimento special na Minister di Cultura, Xiomara Maduro, Comision Celebracion Dianan Nacional (CCDN) y henter e ekipo cu a organisa cada evento pa brinda Aruba un bunita programa.
“Esaki sigur tabata loke nos tabata tin mester como pais. Ohala cu e mesun amor y patriotismo cu nos a demostra den e dianan aki, inspira nos den e retonan cu nos tin cu experiencia den nos dia diario y pa nos uni den e lucha pa hiba nos pais padilanti”, Prome Minister Evelyn Wever-Croes a expresa.
