Secretario General di MEP Endy Croes: ATENDE CU COSTO DI BIDA Y MEHORA PODER DI COMPRA TA NOS PRIORIDAD

Recientemente, Partido MEP a presenta 7 punto di prioridad. Despues di a haci masha hopi bishita den pueblo pa scucha cu hopi atencion, alabes a laga haci un encuesta a logra destila e 7 puntonan di mas importante cu ta bibando den pueblo. Esaki hustamente a bira e 7 puntonan di prioridad cu MEP a pone den su programa pa e proximo 4 aña. Pues e 7 puntonan di prioridad a wordo traha hunto cu pueblo y ta hinca den otro den un forma realisabel den e siguiente 4 aña nos dilanti.

MEP a logra stabilisa Pais Aruba y crea un surplus

MEP den gobierno a logra stabilisa Pais Aruba. Saliendo for di un pandemia a percura pa crea espacio financiero pa por sigui maneha nos pais. Sigur esaki no tabata un tarea facil, pero cu determinacion a tuma e decisionnan concreto y corecto a logra esaki. Pa di 3 aña consecutivo ta logra un presupuesto cu un surplus. Door di logra un surplus por a cuminsa paga e debenan di Pais Aruba (e.o. e Mega Debe di Mike Eman y AVP), pero tambe tin e espacio awor pa inverti e proximo 4 aña den e hende, esta den e ser humano.

Con MEP lo atende cu costo di bida pa baha esaki?

Nos lo percura mesora pa amplia e canasta basico y bin cu control mas riguroso riba e productonan cu prijs controla pa gobierno. Lo percura pa habri e posibilidad pa importa carni y galiña for di Colombia, cual lo reduci e prijs cu alrededor di 30%. Lo percura pa yuda y incentiva e comerciantenan pa logra baha e prijs di importacion pa asina esaki por refleha bek den baha gasto di producto. Esakinan lo bira e prome pasonan directo pa alivia y yuda baha e costo di bida pa henter nos pueblo.

Con MEP lo mehora e poder di compra di nos conciudadanonan?

Lo sigui aumenta pensioen y sueldo minimo na un manera responsabel y sostenibel. Tambe, lo sigui aumenta onderstand pa esnan cu limitacion. MEP lo percura pa baha e tarifa di loonbelasting pa e conciudadano por keda cu mas placa di su salario incluyendo overtime den su man fin di luna. Lo percura pa baha tarifa di coriente y ta introduci un subsidio (energie toeslag) pa e famianan den necesidad. Ademas di esaki, MEP ta propone pa introduci un subsidio (creche toeslag) pa e mayornan cu tin yiu cu ta bay creche. Lo elimina schoogeld pa kleuter y scol basico pa e famianan den necesidad. Por ultimo, lo percura pa mas vivienda social y pagabel. Haciendo tur esaki lo percura pa e ciudadano su poder di compra mehora y keda cu mas placa den su man fin di luna y asina halsa e calidad di bida di cada un di nos. Pues  awor cu tin espacio financiero danki na e maneho cu MEP a hiba despues di Covid 19 lo inverti den e “hende” atendiendo e tema di costo di bida den combinacion cu mehoracion di e poder di compra. Pa MEP semper e hende ta central y hunto nos lo logra. Cu bo sosten dia 6 di december proximo nos lo percura pa pueblo haya e alivionan bon mereci.