Debate Electoral 2024 lo tuma luga riba 14 di november 2024

Oranjestad – Falta algun siman pa nos ciudadanonan por bay eherce nan derecho di voto pa loke ta trata Eleccion 2024. Diesun partido politico ta participando na e eleccion, cu lo tuma luga riba 6 di december proximo. En conexion cu esaki, Camara di Comercio y Industria di Aruba (KvK) conhuntamente cu Universidad di Aruba, Setar y TeleAruba, lo organisa un debate electoral caminda e lidernan di e diferente partidonan politico di Aruba ta invita pa debati riba varios topico relevante pa e maneho gubernamental di Aruba pa e proximo gobernacion y añanan venidero.

E meta ta pa a base di un plataforma obhetivo, brinda pueblo di Aruba e oportunidad pa por sigui di cerca e debate unda topiconan critico ta wordo discuti. Mediante e debate e lidernan politico cu ta participa na eleccion 2024 por trece nan propuestanan y solucionnan encuanto e diferente retonan y oportunidadnan cu tin pa Aruba. Di e forma aki KvK ta contribui na trece mas informacion di cada partido pa asina e votadonan por vota consciente.

E fecha di e debate lo ta 14 di november 2024. E debate lo ser transmiti en bibo via Tele-Aruba y via “live-stream” via Youtube y Facebook. Lo tin un moderador cu lo dirigi e debate y e biaha aki atrobe lo haci uzo di e plataforma digital, cortesia di SETAR NV, pa publico por interactua durante di e debate. E topiconan ta basa riba asuntonan importante pa pueblo di Aruba en general cu merece e debido atencion. Nos por menciona topiconan cu ta regarda costo di bida, cuido medico y salud, siguridad y husticia, finansa publico, vivienda pagabel, reforma economico y laboral, turismo, medio ambiente y cambio di clima, enseñansa y technologia. E debate lo consisti di tres tanda, den cual e lider politico lo haya e oportunidad pa duna nan opinion riba algun ponencia, y tambe reacciona riba e opinion di otro lidernan politico. Alabes, lo duna oportunidad den un siguiente tanda, na un otro candidato di e partido pa presenta su mes, comparti su vision y debati riba e topiconan presenta.

KvK ta invita henter pueblo di Aruba pa sintonisa e debate. Alabes, por manda preguntanan cu lo desea pa haci e lidernan politico durante e debate na debate2024@arubachamber.com te cu diaranson, 13 di november 2024.