The Hilton a honra y celebra aniversario di nan empleado den forma grandi

PALM BEACH –  The Hilton Aruba Caribbean Resort & Casino a honra un grupo realmente remarcabel di empleadonan recientemente, den presencia di General Manager Lawrence Tuck,  representantenan di gerencia, otro comerciantenan manera Rene Kan, minister di Turismo Danguillaume Oduber, miembronan di comision ehecutivo y miembronan di departamento di HR.

Glenn Farro, Director di HR, a disfruta di e privilegio di por conduci un parti oficial di henter e encuentro aki. Durante e evento, e resort a honra 19 individuo cu a mustra un compromiso remarcabel y kende a yuda crea e fundacion stabil di e resort su exito desde 1959. Esnan honra ta conta tur hunto cu 576 aña di experiencia di trabao valioso. “E logro aki ta bisa hopi tocante e dedicacion y tipo di pasion cu ta haci e team na The Hilton Aruba Caribbean Resort & Casino uno extraordinario,” Farro a expresa durante su discurso.

Entre esnan honra tabata tin dos persona hopi remarcabel kende a sirbi e hotel pa hopi tempo, sobresaliendo den nan rol anto inspirando generacionnan di colega. Mientras cu nan ta prepara pa retira, na edadnan respeta di 73 y 75, e resort ta desea nan tur cos bon, descanso di trabao, anto un transicion suave den nan siguiente capitulo di nan bida despues di varios aña di servicio.

E anochi tabata dedica na esnan honra, mientras cu cada un a presenta nan mes riba escenario pa accepta nan certificado, pins y otro regalo. Durante esaki a tuma luga, nan storianan personal di crecemento y logro a keda comparti cu tur hende presente.

E encuentro a repasa nan trayecto personal y subraya e miho momentonan den nan carera, nan logronan, cu hopi aplauso di nan coleganan. Locual a resalta sigur di e storianan comparti tabata e realisacion cu careranan ta realmente wordo crea pa medio di pasion y entusiasmo, anto nan ta keda reconoci y celebra pa un tempo hopi largo.

Aquilinio Gadia, a keda honra pa 25 aña di servicio, hunto cu Ronaldo German, Carolyn Santos, Anastacia ‘Tasha’ Agana, Liliana Angela Garcia, Roque Martinez, y Germaine-Geerman Wever.

Esnan honra pa 30 aña di servicio tabata Maria Ureña, Angeline Dijkhoff, Jairo Maduro, Ramon Weindal, y Maikel Ras.

Honra pa 35 aña di servicio tabata Hubert Rozenberg, Thelma Franken, Edeltrudis ‘Betico’ Flanegin, Jessica Robert, y Lucretia Minerva Pantophlet.

Honra pa 38 aña di servicio tabata Bibi Ohab y Tomas Giel.

Bibi Ohab tabata director di Housekeeping pa hopi aña largo. El a cuminsa prome como night-senior supervisor na 1986, demostrando abilidadnan fuerte di liderazgo, cual a causa su promocion casi inmediato como executive-housekeeper, despues bayendo na su posicion actual como director. Bibi ta lidera un team multicultural cual ta sigura standard halto di limpiesa y decoracion n’e resort. Su compromiso pa brinda nos bishitantenan experiencianan excepcional semper a resalta.

Tomas Giel a disfruta di un carera di 56 aña den hospitalidad, mayoria di esaki tabata na e resort mes na unda el a sirbi guest cu amabilidad, profesionalismo, compromiso y dedicacion n’e spirito y zjeito cu ta hospitalidad Rubiano. Tomas a cuminsa su trayecto den e resort na 1986 manera un capitan/waiter y actualmente ta Assistant F&B Supervisor, prome cu e bay disfruta di su pension bon mereci.

Den su discurso, General Manager Lawrence Tuck a declara cu den su biahenan como hotelier rond mundo na varios propiedadnan internacional, e nunca a conoce un dedicacion di largo plaso asina grandi manera e tipo di pasion cu bo ta haya na Hilton Aruba Caribbean Resort, na unda cu empleadonan ta consistentemente traha pa logra resultadonan di calidad halto y crea relacionnan fuerte cu aspiracion na progreso y crecemento.

Net prome cu e ceremonia di premiacion, minister di Turismo Danguillaume Oduber, a subi escenario y gradici esnan nomina, reconociendo nan contribucion na nos turismo y economia di Aruba. “Nos trabao ta pa trece e bishitantenan aki, y boso trabao ta pa haci cu nan bishita ta uno agradabel, cu nan ta bon trata y cu nan ta stima cada minuut unico cu nan ta pasa riba nos isla, y laga algun placa atras pa sigui engrandece nos economia, hibando cu nan bek recuerdonan inolvidabel. Danki pa boso trabao den brinda un producto fenomenal na nos bishitantenan.”

E team culinario y di banquet a sirbi un dinner di tres curso cu escogencia di appetizer y main course. Pa postre, esnan presente por a disfruta entre sweet potato pumpkin pie cu crème anglaise of un baked Alaska individual cu vanilla y chocolate ice cream topped cu teasted marshmallow. E evento a conclui cu sacamento di potret den grupo como tambe individual.