Partido MEP: PRIORIDAD #6: BARIONAN

Partido Movimiento Electoral di Pueblo tin un programa prepara pa adresa tur e retonan cu nos pais ta enfrentando. Despues di a sali di un pandemia, gobernacion di Partido MEP a stabilisa e pais, percura pa crecemento economico y awor cu a crea espacio financiero Partido MEP ta bay enfoca riba 7 punto di prioridad.

Prioridad#6:

Asfalta camindanan

Partido MEP cumpliendo cu deseo di e pueblo lo sigui asfalta  camindanan y mehora e aspecto di nos barionan. Lamentablemente debi na e pandemia, durante varios aña no por a inverti den mantene y asfalta nos careteranan. E motibo di esaki ta cu e placa cu tawata aloca pa esaki mester a wordo usa durante e pandemia pa salba bida di hende, pa yuda esnan cu no tawatin trabou y comerciantenan pa asina nan no bati bancarota y kita trahadonan di trabou etc. Awor Gobierno a aloca 18 miyon florin pa aña, pa mantene y asfalta careteranan den bario. Lo pone luz di caminda pa trece mas siguridad y mehora e aspecto di e bario. Unda ta necesario lo pone “verkeersplateau” pa evita cu autonan ta core demasiado duro cu ta causa un peliger. Pero tambe ta pidi automobilistanan nan cooperacion pa no core duro pasobra camindanan den bario no ta pa dragracing.

Combati sushedad riba Aruba

Lamentablemente Aruba a bira hopi sushi. Durante e 4 añanan nos dilanti, cu un plan eficiente y cu implementacion estricto Partido MEP lo percura pa haci Aruba limpi un biaha mas y manten’e asina;

-Lo baha tarifanan di hiba y procesa sushi

-Percura pa tin bakinan di sushi den bario tur dia y den tur bario

-Un maneho estricto di multanan pa esnan cu ta sigui susha Aruba

-Lo enfoca riba campañanan di conscientisacion pa tene Aruba limpi

Combati problema di cacho riba caya

Partido MEP lo traha pa combati e problema di cacho riba caya cu no tin doño. Cachonan los riba caya ta causa molester y por ta un peliger pa ciudadanonan cu ta cana pa relaha, haci un respondi of pa ehercicio. Partido MEP ta di opinion cu situacion aki no por sigui asina. Cachonan cu tin doño mester wordo atendi pa e doño. Tin un Ley di Cacho  ta bisa cu e cacho mester ta den cura. E unico motibo cu e cacho ta sali di cura ta ora cu e doño ta sali cu ne na leash pa haci su nececidadnan of pa ehercicio. Pero aparte di esey cachonan mester ta den cura pa asina no causa molester na ciudadanonan. Pa loke ta trata cachonan riba caya cu no tin doño, Gobierno lo atende cu nan.

Partido MEP ta haci un apelacion na henter comunidad, ora bo dicidi di busca un mascota, sea cacho of pushi, e ta bo responsabilidad pa proteg’e y cuid’e. E no ta un coi hunga cu ora bo cansa di dj’e of e bira bieu, bo ta tir’e afo. Bo ta compromete bo mes pa dun’e amor, cariño y specialmente di dun’e e cuido veterinario. Y esaki ta inclui castra of sterilisa e mascota pa evita e ta haya yiu sin control y e ora kier hisa benta nan riba caya pasobra bo no por cuida nan. Tur animal tin derecho y ta merece di wordo trata cu dignidad paso esey ta refleha e clase di comunidad cu  tin na Aruba.

Awor cu a crea espacio financiero, Partido MEP lo atende cu e temanan den nos barionan.