Candelario Booshi Wever : ALGO LO CAMBIA DESPUES DI 6 DI DECEMBER??

President di Merca Abraham Lincoln a adverti den pasado cu “America will never be destroyed from the outside. If we falter and lose our freedoms, it will be because we destroyed ourselves”. Aruba lo dicidi 6 di december 2024 ki rumbo nos lo sigui! Nos ta sigui braza cannibalismo, oportunismo y corrupcion of nos ta bisa ta basta cu e decadencia den politica y politiconan cu kier laga nos kere cu nunca nan a kibra un kopi. Mi a mustra caba con oportunismo y cannibalismo a hasi su entrada den politica. Despues cu e nombernan a bira conoci y evaluando loke ta sali den medionan di comunicacion mi ta teme cu nada lo bay cambia den e forma cu lo duna contenido na politica y con nos pais lo bay ser goberna. E debate organisa pa San Nicolas Business Association na San Nicolaas ta un muestra palpante con politiconan ta sigui fomenta puro promesanan sin plannan y pasonan concreto con pa goberna drechi. E realidad amargo ta cu simpelmente NO tin vision ni tampoco un idea con pa ehecuta un cambio cu lo beneficia nos pueblo pa termino largo. Ela bira obvio cu e partidonan a haya nan mes cu dificultad pa haya profesional local subi nan lista. E motibo ta falta di confiansa y principalmente e temor di wordo involucra tambe den actonan cu no por waak luz di dia. Ta increibel di waak con niun hende ta bisa algo kico lo bay hasi pa recupera nos autonomia cu a ser entrega. Ta logico cu ta prefera di keda keto, pasobra e berdad lo indica ta kende ta esnan cu a bende Aruba na prijs di baca flaco. Niun palabra con lo duna bida na Serlimar cu a de facto ta solamente ta recohe sushi, niun palabra riba e hecho cu tin un corupto ta participa den e eleccion aki cu parce a asumi e rol di “yo no fui” y e salbador di patria. Ta p’esey mi ta convenci cu NADA lo bay cambia es mas cu e lo bira pio, pasobra nos pueblo atrobe lo bay cay pa politiconan cu no tin interes di Aruba na pecho.