A.T.A. ta comparti cifranan pa luna di oktober 2024 y resumen di strategia pa cu Plan Corporativo 2025

Aruba Tourism Authority (A.T.A.) ta implementa un cambio strategico pa yega na un modelo di maneho di destinacion segun balans y sostenibilidad cu ta balora tanto e bienestar di nos residente como e experencia di e huesped. Lo bai atrae huespednan cu ta contribui activamente na un futuro sostenibel di e isla. E direccion nobo aki tambe ta trece mas colaboracion cu socionan local y internacional, asegurando cu e satisfacción di e residente y e huesped ta keda uno central.

Manera otro destinacionan mundial, manera Mallorca, Barcelona, y Venezia ta enfrenta reto di Sobre Turismo, Aruba a bin ta tuma pasonan concreto, pero ta reconoce cu mester di mas paso proactivo pa mitiga y evita cualquier impacto negativo. Segun Jeremy Sampson, CEO di Travel Foundation, un organisacionan dirigi riba entidadnan encarga cu Maneho y Mercadeo di Destinacionan (DMMOs), manera A.T.A., “organisacionan asina mester ahusta nan accion pa move for di un strategia unda ta encurasha mas turismo, pa awor un strategia unda cu ta enfoca riba un balans.”

A apunta ocho (8) punto di enfoke pa 2025 pa yuda na mitiga Sobreturismo y promove Turismo Regenerativo. Esfuersonan cu lo ta centralisa riba stabilisa e cantidad di huespued cu ta yega Aruba, mientras cu ta implementa un strategia di reemplaso cu ta priorisa turismo regenerativo y desaroyo sostenibel. Esaki ta inclui transforma e turismo tradicional pa uno cu ta adopta practicanan cu ta protehe e ecosistema, restaura medio ambiente, y inverti den e infrastructura cu ta sostene turismo na un manera responsabel. Prioridadnan principal ta inclui agrega na e communicacion local y e interaccion cu e huespednan, pa acticavemente envolvi e comunidad local pa stimula participacion abase di educacion, y promove desaroyo di turismo niche y socionan strategico. Adicionalmente, strategianan basa riba dato cu lo dirigi desaroyo sostenibel, apoya pa implementacion di un plan pa turismo di Crucero sostenibel, tambe lo forma parti di accionnan delinea.

A.T.A. ta guia e esfuerso colectivo aki hunto cu socionan local, y ta evaluando continuamente su strategianan pa garantisa un futuro sostenibel pa Aruba. Un strategia cu lo enfoca riba mitiga e impacto negativo causa pa e aumento den cantidad di huesped. “Nos meta no ta pa crece sin limite, pero pa stabilisa e cantidad di huespednan, gradualmente.” tabata palabranan di Ronella Croes, CEO di A.T.A.

Lo move e enfoke pa remplasa turismo cu nos ta ricibi awor cu huespednan di balor halto cu ta balora nos mentalidad di un Turismo Responsabel, cu ta respeta nos medio ambiente y cultura, y cu ta contribui significamente na nos economia.

A.T.A. lo keda pone enfasis pa mehora y mantene esfuerzonan pa logra e balans menciona segun e modelo di High Value-Low Impact cu ta consisti di cuater pilar; ‘Calidad di Bida di e Residente’, ‘Calidad di Experiencia di e Bishitante’, ‘Proteccion y Preservacion di Naturalesa & Medio Ambiente’, y ‘Contribucion Economico na nos isla’. Lo enfoca na atrae e bishitante cu lo inverti mas, pero alabes e bishitante cu ta mas consciente y ta balora y proteha nos cultura, naturalesa, tera, awa, nos hende, y nos economia.

ESTADISTICA CONFORME ACTUALISACION DEN E INDUSTRIA DI TURISMO:

VOLUMEN (“STAYOVER”) CU RESULTADO POSITIVO ADICIONAL DI 16.4% DEN OKTOBER 2024 COMPARA CU OKTOBER 2023

Conforme e demanda por bai mira tambe cu e aerolineanan lo sigui expande capacidad y asina permitiendo nos captura e demanda. Den oktober 2024, Aruba a ricibi un total di 104,037 huesped “stayover”, esaki ta un crecemento di 9.5%, si compara cu oktober 2023, unda a ricibi 94,996 huesped “stayover”.

MERCADONAN Y CATEGORIANAN DI ACOMODACION

Den oktober 2024, 76.5% di e total di e huespednan “stayover” pa Aruba a bishita for di Norte America, 6% a bishita for di Europa, 14% a bishita for di Latino America y 3.5% tawata procedente di otro partinan di mundo.

Mirando e categorianan di acomodacion, den september 2024 25.2% di huesped a keda den hotelnan European Plan, 17.3% a keda den hotelnan All-Inclusive, 26.2% a keda den Timeshare, y 31.2% a keda den otro tipo di acomodacion, conoci tambe como short-term vacation rentals.

SHORT-TERM VACATION RENTALS (STVR)

A.T.A. tin acceso na un plataforma unda por wak e cantidad di cas, apartamento y villas cu ta wordo uza como vacation rentals como tambe e prijs averahe pa anochi, e ocupacion y un calculacion di e entrada cu esakinan ta genera. Den 2023, segun un estudio, A.T.A. a logra actualisa inventario di Condominiums existente y condominiums cu actualmente ta na caminda pa realisacion, y lista actualisa di lugar di estadia cu no ta un hotel pero cu si ta disponibel na e turista cu ta keda na Aruba pa un corto tempo.

Si compara oktober 2024 cu oktober 2023 por wak cu e ocupacion averahe di e acomodacionnan aki a subi cu 3.7 punto di porcentahe, for di un averahe di 43.9% na oktober 2023 pa un averahe di 47.6% na oktober 2024.

Den caso di entrada, si compara oktober 2023 cu oktober 2024 por wak cu e categoria ta conta cu un disminuicion den entrada di -4.9%.

Short-term Vacation Rentals
	2019	2020	2021	2022	2023	2024
Occupancy	40%	32.1%	45.1%	38.5%	43.9%	47.6%
Revenue	5,061,417	4,994,934	8,224,833	9,731,390	15,881,147	15,108,946
ADR	161	181	194	202	246	236

2024 (Year to Date)

Te cu oktober 2024, Aruba a ricibi un total di 1,186,508 huesped “stayover”, esaki ta un crecemento di 14.1% compara te cu oktober 2023, unda a ricibi 1,025,153 huesped “stayover”. Ora ta yega na lider den mercado, te cu oktober 2024, 79.9% di e huespednan ta di Norte America, 4.9% ta di Europa, 12.7% ta di Latino America, y 4.9% tawata procedente di otro partinan di mundo.

Bishita www.ata.aw tur luna pa A.T.A. ‘Statistical Monthly Report’ y e Plan Corporativo 2025.