GLOBAL MONEY WEEK TA TUMA LUGA PA PROME BES NA BONEIRO

“Minister Xiomara Maduro a dirigi palabra na e hobennan durante di e apertura“‘

Oranjestad – Riba invitacion di e organisadonan di Global Money Week, Minister Xiomara Maduro a dirigi algun palabra na e hobennan participante, durante di e apertura cu a tuma luga dialuna dia 21 di maart.

E mandatario ta aplaudi e bunita iniciativa di Terramar Museum Bonaire pa trece Global Money Week na Boneiro cu danki na e colaboracion di varios instituto financiero na Boneiro a haci posibel cu e hobennan por experiencia e tremendo proyecto educativo internacional aki.

Minister di Finansa y Cultura a trece dilanti cu e actividadnan financiero di Global Money Week lo empodera cada un hoben participante pa siña di ta mas responsabel riba tereno financiero for di un edad jong. E hobennan lo compronde e importancia con pa maneha nan asuntonan financiero y bira mas consiente di esaki. Esaki lo yuda nan pa tuma decisionnan financiero responsabel awo y den futuro.

E dignatario a subraya cu na Aruba tambe e hobennan a yega di participa na e Global Money Week y tabata un placer pa ora ela bishita e actividadnan pa scucha e testimonio di e participantenan con e actividadnan a aporta na amplia nan conocemento financiero.

Minister Xiomara Maduro ta encurasha e participantenan na Boneiro pa haci bon uso di e oportunidad pa pone hopi atencion, participa y haci pregunta durante di e sessionan e siman aki.  E mandatario a expresa, ‘Mas bo sa, miho decision financiero bo por tuma desde awor y den futuro, y di e manera aki aporta tambe na e progeso economico y financiero di un miho Boneiro. Na Hulandes tin un dicho ta bisa ‘Jong geleerd, oud gedaan’.

Minister Maduro ta gradici Terramar Museum Bonaire, Embahador di Global Money Week sr. Serginho Finies y tur partner cu ta haci Global Money Week posibel. Masha danki pa e tremendo iniciativa. Na tur hoben cu ta participa, Minister Maduro ta desea hopi exito y un siman fructifero yena cu hopi sabiduria.