A ENTREGA UN RELATO DI OCHO PAGINA NA PARLAMENTO TOCANTE BISHITA Y REUNIONNAN NA HULANDA
ORANJESTAD – Siman pasa, Minister di Husticia y Asuntonan Social Sr. Rocco Tjon a haci un biahe pa Hulanda, caminda a reuni cu diferente instancianan hudicial, Minister encarga cu Husticia y Siguridad como tambe Minister encarga cu “rechtsbescherming”; cual ta encarga cu e parti di “gevangeniswezen”. E meta principal di e biahe y e reunionnan aki tawata pa sera y amplia e cooperacion entre e diferente departamentonan. Tambe a enfatisa riba e importancia pa percura cu e cooperacion aki, specificamente riba e tematica di combatimento di criminilidad, por ta uno solido mirando cu hopi bes nos ta falta cierto experticio na Aruba, pa motibo cu esaki ta uno hopi caro. Pa e motibo aki, ta importante pa sera lasonan di cooperacion cu e diferente departamentonan aki na Hulanda, pa na momento cu un incidente pasa na Aruba, nos por conta cu e sosten di inmediato di e instancianan aki.
Minister Tjon, a entrega un relato di ocho pagina na parlamento di Aruba, cual tambe ta obtenibel pa publico en general, caminda ta amplia detayadamente riba cada reunion y nan proposito. Manera ta visibel den e documento, e Mandatario y su delegacion a reuni entre otro cu director di “National Cyber Security Centrum” (NCSC) Sr. H. de Vries, kende su departamento ta percura pa hulanda ta digitalmente sigur. A papia di cooperacion entre Hulanda y Aruba, di cual e delegacion a reuni, y a haci palabracionnan concreto, caminda otro siman e diferente solicitudnan lo bay Hulanda pa asina por concretisa e diferente palabracionnan.
Minister Tjon y su delegacion a bishita y reuni tambe na Rotterdam Zuid, den cuadro di nan programa nacional di prevencion y combatimento di corupcion. Siguientemente a reuni cu “Nationaal Coördinator Terrorismebestrijding en veiligheid” Sr. P.J. Aalbersberg specificamente riba e cooperacion cu lo por tin, pa por duna miho contenido na esaki ora ta trata e parti di siguridad nacional, “cybersecurity”, y combatimento di terorismo. Asina por sigui elabora riba e otro reunionan cu a tuma luga, entre otro cu Minister di Rechstbescherming, Sr. F. Weerwind, “National High Tech Crime Unit” (THTC) na Nationale Politie como tambe e “Team Bestrijding Kinderporno y Kindersekstoerisme” (TBKK). Tambe a reuni cu korspchef di nationale politie Sr. H. van Essen, Minister di Husticia y Siguridad Sra. D. Yeşilgöz-Zegerius, plaatsvervangend directeur-generaal “Politie en Veiligheidsregio’s” Sra. Monique Commelin. A reuni tambe cu “Dienst Justitiele Inrichtingen” (DJI) directora di e division “gevagneniswezen y vreemdelingenbewaring “ Sra. Monique Schipper.
Por ultimo, e Mandatario a expresa di ta sumamente contento cu e resultado di e biahe, caminda a logra haci palabracionnan concreto cu Hulanda, na mes momento a haya reaccion positivo di Hulanda, caminda a indica di ta habri pa amplia e cooperacion cu Aruba. Pues, dentro di poco, e grupo di delegacion lo ta preparando tur e documentacionnan di solicitud pa asina oficialisa e peticion cu ta bin di parti di Ministerio di Husticia y Asuntonan Social pa cu cooperacion cu Ministerionan, Instancianan y Departamentonan na Hulanda.