Den presencia di famia y coleganan

49 POLIS A RICIBINAN DIPLOMA DI KADEROPLEIDING

MACUARIMA, ARUBA:  Recientemente na Hyatt place na Airport a tuma lugar entregamento di diploma di Kader Opleiding pa 49 studiante cu a termina esaki cu exito.

Den presencia di altocomisario di Polis, drs. Ramon Arnhem, mando policial, staff y famia a presencia e bunita acto aki.

E estudio riba su mes ta basta pisa y tabata tin un trayectoria largo y intensivo cu a tuma lugar aki na Aruba mes. Pa altocomisario di Polis Arnhem e ta masha orguyoso di mira mas agentenan policial sigui wordo desaroyo y cu pronto lo mester tuma funcion nan importante den Cuerpo Policial Aruba.

“E meta di habri diferente estudio policial ta pa duna cada un Polis e chens pa nan sigui desaroya pa nan sigui avansa den carera policial. Sea ta cu training of estudio ta importante cu e Polis ta central pa haya e atencion cu e merece. Den futuro lo sigui habri mas estudio policial pa e siguiente generacion por sigui desaroya. Esaki ta un momento special y unico cu awe nan ta hayanan diploma den presencia di nan famia cu sigur ta hunga un rol importante di sosten pa e Polisnan” Tabata palabranan di Arnhem cu ta  orguyoso di mira un klas grandi termina nan estudio di Kader opleiding exitosamente.

Masha pabien na cada un agente policial cu a dedica hopi tempo den e estudio intensivo aki cu na final a duna su fruto. Danki na cada un docente tanto interno y externo cu a haci e opleiding aki posibel. Danki na cada un famia cu ta brinda e sosten pa e agente policial por sigui desaroyo su mes! Masha pabien y hopi exito den boso carera policial!