Wendrick Cicilia bon ricibi den Pos Chikito y Sabana Basora
Den fin di siman Wendrick Cicilia a sigui campaña den e barionan di Pos Chikito y Sabana Basora. El a pasa na diferente adres den e barionan aki p’asina cera conoci cu e habitantenan, pero tambe pa papia cu nan riba su plannan como politico hoben.
Durante su bishita, unda cu e tabata bon ricibi, el a papia cu hopi adulto mayor p’asina scucha nan. Tambe hunto cu su team a hisa diferente bandera di AVP como parti sticker. E ta contento y gradicido di e bon ricibimento cu el a ricibi fo’i e habitantenan di Pos Chikito y Sabana Basora, kendenan a habri nan portanan di cas pa scuch’e y deposita nan confiansa den su persona.
Cicilia, kende ta number 1 di AVP, e lider di e lista, a bisa cu e momento di bolter cos a yega y percura pa hiba Aruba na e nivel cu mester ta. A yega ora pa e pueblo, e adultonan mayor, e hobennan hala rosea mirando con cos ta bayendo bou e gobernacion actual.
Bishita e pueblo ta importante pa gana e confiansa pa por haci e cambio cu Aruba mester.
Tocante Wendrick Cicilia
mr. Wendrick Cicilia ta un hoben hurista y candidato di Partido di Pueblo Arubano (AVP). Prome cu drenta politica a traha den banco y oficina di abogado. Su pasion pa yuda su prohimo a hib’e na ta un di e fundadornan di Tienda di Ley na 2018. E la gradua na 2019 for di e Facultad di Derecho di Universidad di Aruba. Na 2021 a tuma e curashi y determinacion pa subi e lista berde. Durante e ultimo eleccion Wendrick Cicilia a logra convence 482 ciudadano cu nan voto, profilando su mes den e top 10 cu mas voto di tur e 29 candidato rib’e lista di AVP. For di 2021 e ta consehero legal di e fraccion AVP den parlamento. Na october 2024 e la logra su titulo di meester in de rechten. 18 October 2024 e la bira lider di e lista di AVP, pues e lijsttrekker mas hoben den historia di Aruba.
